Fjalimi i kryeministrit Albin Kurti në mbledhjen e Këshillit të Përgjithshëm, ka nxitur reagimin e Asociacioni të Gazetarëve të Kosovës.
Deklarimet e Kurtit se “mediat për çdo sulm e agresion të Serbisë ndaj shtetit tonë, fajtorin çdoherë e gjetën tek qeveria jonë, por asnjëherë tek Serbia, nuk meritojnë vëmendjen tuaj” dhe se “Kurrë nuk kanë qenë më shumë media kaq shumë kundër qeverisë sesa në këtë katër vjeçarin tonë. Unë besoj se kjo është për dy arsye apo ndoshta shkaqe themelore. E para, sepse ne nuk i paguajmë. E dyta, sepse tash mediat nuk frikësohen më nga pushteti”, AGK-ja i ka quajtur sulm të papranueshëm kundër mediave.
“AGK-ja e dënon fuqishëm këtë gjuhë ofenduese dhe shumë të rrezikshme të kryeministrit Kurti, që i rendit mediat e Kosovës përkrah Serbisë. Një fjalor i tillë i papranueshëm që vjen nga kreu i qeverisë, direkt vë në rrezik sigurinë e gazetarëve dhe punonjësve të tjerë të medias. Është koha e fundit që zoti Kurti të ndalojë së përdoruri një gjuhë të tillë të nxitjes së urrejtjes ndaj mediave, që pastaj reflektohet dhe shumëfishohet nga shumë prej votuesve të tij”, thuhet në reagimin e AGK-së.
Tutje në reagim thuhet se në respektim të lirisë së medies dhe lirisë së shprehjes, “gazetarët dhe mediet në Kosovë duhet të lejohen që të ushtrojnë punën e tyre për të mbajtur përgjegjëse qeverinë, pa u penguar dhe intimiduar nga pushteti”.
