Sot janë bërë 26 vjet nga Masakra e Belegut të Deçanit, ku u vranë e masakruan 46 shqiptarë.
Presidentja Vjosa Osmani ka kujtuar këtë masakër, si një prej më të rëndave që u krye nga forcat paramilitare serbe.
Ajo ka thënë se pas kaq vitesh fati i disa banorëve të zhdukur me dhunë nuk është zbardhur, “ndaj plagët mbeten të hapura për familjet dhe për gjithë Kosovën”.
“Drejtësia mbetet borxh ndaj tyre dhe ndaj historisë sonë”, ka shkruar në Facebook.
“Një çerek shekulli më parë, në oborrin e një shtëpie në Beleg të Deçanit, forcat policore, ushtarake dhe paramilitare të regjimit gjenocidal të Serbisë ndanë burrat dhe të miturit nga gratë dhe më pas ekzekutuan e masakruan 46 shqiptarë. Kjo ishte një nga masakrat më të mëdha të kryera nga forcat paramilitare serbe, të cilat në vitin 1999 nisën një ofansivë të egër ndaj popullatës civile”, ka shtuar më tej.
