Sulmuesi i krahut Luis Diaz nuk është duke e menduar largimin nga skuadra e Liverpoolit këtë verë. Të martën në një intervistë për “Gol Caracol”, Diaz u shpreh se është i lumtur me skuadrën e Liverpoolit.
“Jam shumë i lumtur në Liverpool, është një ekip dhe klub i madh. Gjithmonë kam dashur të luaj atje, ndaj jam shumë i lumtur dhe i qetë.
Nuk po mendoj për asgjë tjetër, po mendoj për kombëtaren e Kolumbisë, ku jemi”, ka theksuar Diaz.
Barcelona dhe Paris-Saint Germani janë dy skuadrat që janë të interesuara që t’i sigurojnë shërbimet e kolumbianit.
27-vjeçari u transferua te Liverpooli në vitin 2022, nga Porto për 50 milionë euro.
Sheshko nuk largohet nga Leipzigu
Sulmuesi Benjamin Sheshko do të qëndrojë te skuadra e RB Leipzigut edhe për disa sezone. Të martën eksperti i transferimeve Fabrizio Romano ka njoftuar se Sheshko do të nënshkruajë kontratë të re me skuadrën gjermane.
21-vjeçari është kërkuar nga disa prej skuadrave kryesore të Premier Leagues, por ai ka vendosur të qëndrojë dhe ta vazhdojë karrierën të Leipzigu.
Trajneri i Leipzigut Marco Rose e konsideron Sheshkon si lojtar vendimtar për projektin e tij sezonin e ardhshëm në Bundesligë.
Slloveni në edicionin 2023/2024 ka treguar paraqitje të mira me fanellën e Leipzigut. Në 42 ndeshje të zhvilluara, Sheshko ka shënuar 18 gola dhe ka kontribuar me dy asistime.
