Torino e sfidon kampionin në fuqi të Serie A, Interin, në kuadër të xhiros së shtatë. Ndeshja Inter – Torino zhvillohet të shtunën nga ora 20:45.
Të dy skuadrat i kanë nga 11 pikë dhe kërkojnë fitoren për të mos humbur hapin me skuadrat e kreut të tabelës. Interi është i katërti e Torino e pesta.
Interi shkatërroi 4:0 Cërvena Zvezdën në Champions, ndërsa ndeshjen e kaluar e kishte fituar 3:2 ndaj Udineses. Ajo fitore erdhi pas humbjes 2:1 në derbin lokal me Milanin.
Torino ka pasur kohë më të gjatë për ta përgatitur ndeshjen e vështirë në udhëtim. Javën e kaluar humbi 3:2 nga Lazio. Kishte humbur edhe në ndeshjen për Kupë, 2:1 nga Empoli. Skuadra torineze në fakt nisi mirë kampanjën, por tani duhet ta ndërprejë serinë e humbjeve.
Të shtunën nga ora 18:00, Atalanta luan në shtëpi ndaj Genoas.
Të dielën fillimisht Juventusi e pret Cagliarin nga ora 12:30.
Në ndeshjen e fundit të xhiros, të dielën nga ora 20:45, takohen Fiorentina e Milani.
