Futbollistët e grupmoshës U19 të Kosovës kanë pësuar humbje të thellë në nisje të turneut kualifikues për në Evropianin 2025. Kosova U19 të mërkurën u mposht 4:0 nga Austria e kësaj grupmoshe.
Ndeshja u zhvillua në stadiumin “Fadil Vokrri” në Prishtinë dhe i takoi Grupit 10 kualifikues.
Të udhëhequrit e përzgjedhësit Adil Maliqi golin e parë në ndeshje e pësuan në minutën e nëntë.
Sulmuesi Phillip Verhounig shënoi për 1:0.
Futbollisti që aktivizohet te skuadra e Lieferingut, skuadrës së dytë të Salzburgut, realizoi sërish për 2:0, në minutën e 65-të.
Golin për 3:0 mysafirët e shënuan në minutën e 73-të, me Leon Grgiqin, që luan te skuadra e Sturm Grazit në Bundesligën austriake.
Dhjetë minuta para fundit, Austria U19 e realizoi golin përfundimtar me qendërsulmuesin dhe futbollistin tjetër të Lieferingut, Oghenetejiri Adejenughure.
Në ndeshjen tjetër të po këtij grupi, Spanja mposhti Ishujt Faroe, 3:0.
Ndeshjen e dytë, Kosova U19 e luan më 16 nëntor nga ora 15:00 pikërisht ndaj spanjollëve, që janë fitues në fuqi të Evropianit U19. Austria luan kundër Ishujve Faroe nga ora 12:00.
Grupin 10, Kosova U19 e mbyll me ndeshjen ndaj Ishujve Faroe më 19 nëntor.
Të gjitha ndeshjet e këtij grupi zhvillohen në Kosovë, si nikoqire.
“Dardanët” e rinj luajnë në stadiumin “Fadil Vokrri”, kurse ndeshjet tjera zhvillohen në stadiumin “Zahir Pajaziti” në Podujevë.
Dy përfaqësueset e para në dhjetë grupet e mbetura kualifikuese, bashkë me më të mirin e vendit të tretë, avancojnë në “Elite Round”. Ndeshjet e këtij raundi zhvillohen në pranverën e vitit të ardhshëm.
Kosova U19 me selektorin Adil Maliqi luajti në mars të këtij viti në raundin elitar. Pësoi humbje nga Sllovenia U19 2:0 dhe nga Spanja U19, 2:1. E kishte mposhtur Austrinë U19 1:0, në kuadër të Grupit 1.
Të rinjtë e Kosovës e kishin mbyllur raundin elitar në vendin e tretë dhe nuk kishin avancuar tutje.
Kampionati Evropian 2025 zhvillohet në Rumani, nga 13 deri më 26 qershor 2025.
