Të premten është tërhequr shorti edhe për çerekfinalen e Ligës së Kombeve të UEFA-s. Tetë përfaqësuese luftojnë për titull të kampionit të Ligës së Kombeve.
Itali – Gjermani vlerësohet çerekfinalja kryesore. Kroacia takohet me Francën, Holanda me Spanjën e Danimarka me Portugalinë.
Ndeshjet zhvillohen më 20 dhe 23 mars të vitit të ardhshëm. Gjermania, Franca, Spanja e Portugalia ishin bartëse në short dhe do të jenë vendase në ndeshjet e dyta.
Fituesi i ndeshjeve Itali – Gjermani përballet në gjysmëfinale me fituesin e ndeshjeve Danimarkë – Portugali.
Fituesi i ndeshjeve Holandë – Spanjë në gjysmëfinale përballet me fituesin e takimeve Kroaci – Francë.
Gjysmëfinalet janë më 4 e 5 qershor 2025. Ndeshja për vend të tretë dhe finalja e Ligës së Kombeve janë më 8 qershor të vitit të ardhshëm.
Ndërkohë në plejofin për mbetje apo inkuadrim në Ligën A takohen: Turqia – Hungaria, Ukraina – Belgjika, Austria – Serbia, Greqia – Skocia.
