Trajneri Edward Iordanescu ka vendosur të largohet nga pozita e selektorit të përfaqësueses së Rumanisë.
Lajmi është bërë i ditur të hënën nga Federata e Futbollit të Rumanisë.
Iordanesu në deklaratën e dhënë për faqen zyrtare të federatës rumune është shprehur i lumtur që kishte rastin ta drejtonte përfaqësuesen e shtetit të tij.
“Nderi më i madh për mua ishte dhe do të mbetet fakti që arrita të drejtoj kombëtaren e vendit tim, të përfaqësoj Rumaninë dhe rumunët. Kam trajnuar ndoshta brezin më të dashur të kombëtares, që e ka fituar këtë dashuri me punë dhe përkushtim. Dhe fjalët, të dashur mbështetës rumunë, janë shumë të pakta për të shprehur mirënjohjen time për dashurinë tuaj”, deklaroi Iordanescu.
46-vjeçari e mori drejtimin e Rumanisë në vitin 2022.
Ai ishte në krye të përfaqësueses në 28 ndeshje dhe ka arritur dhjetë fitore, dhjetë barazime dhe tetë humbje.
Iordanescu e udhëhoqi Rumaninë deri në një të tetën e finales në “Euro 2024”.
