(E përditësuar) - Ferizaj ka fituar 2:1 të premten gjatë ditës në terrenin me bar sintetik në Gjilan, ndaj Gjilanit.
Me pikët e plota të fituara në kuadër të xhiros së nëntë të elitës së futbollit kosovar, Ferizaj tani ka kaluar në pozitën e shtatë me 10 pikë, një më shumë se Gjilani që zë vendin e tetë.
Ferizaj kishte pesë disfata rresht para se ta mposhtte Dukagjinin në xhiron e kaluar.
Ndërkohë, Gjilani ka pasur formë të luhatshme.
Në ndeshjen ndaj ferizajasve vinte pas fitores ndaj Prishtinës dhe barazimit në derbi ndaj Dritës në xhiron e kaluar.
Gjilani tani ka katër humbje gjithsej, tri barazime e dy fitore.
Edon Sadriu në minutën e 14-t shënoi për 1:0 në të mirë të Ferizajt.
Golin e dytë e realizoi Abdeen Temitope Abdul, në minutën e 44-t. Abdul shënoi me kokë nga afërsia.
Në minutën e 50-të, Ferizajt iu anulua një gol i shënuar nga Qlirim Avdulli, pasi gjatë ndërtimit të aksionit pati ndërhyrje të palejuar. Kjo u pa nga gjyqtari Dardan Çaka, pas rishikimit të situatës në VAR.
Gjilani u kthye në lojë në minutën e 72-të me golin e sulmuesit Senad Jaroviq. Edhe në këtë rast, ferizajasit protestuan për faull në zonë, por gjyqtari Çaka e pranoi golin pasi u konsultua me VAR-in.
Në minutën e 85-të, Jamal Arago e la Gjilanin me dhjetë lojtarë në fushë pasi mori kartonin e dytë të verdhë. Gjilani mbeti edhe pa Besir Ramadanin, që mori karton të kuq direkt në minutën e 94-t. Edhe ky karton u dha pas rishikimit të situatës në VAR.
Në ndeshjen e xhiros së dhjetë, Gjilani luan sërish në shtëpi dhe e pret Llapin.
Ndërkohë, Ferizaj në “Rexhep Rexhepi” në Drenas, përballet me Feronikelin 74.
Edhe një karton i kuq për Gjilanin
Edhe një karton i kuq i është dhënë futbollistëve të Gjilanit.
Besir Ramadani në minutën e 94-t është përjashtuar direkt nga loja.
Gjyqtari Dardan Çaka e dha kartonin e kuq, pasi e pa situatën në VAR.
Gjilani me një futbollist më pak në fushë
Gjilanit i janë vështirësuar punët në duelin ndaj Ferizajt.
Jamal Arago pesë minuta para fundit, u ndëshkua me kartonin e dytë të verdhë, pas ndërhyrjes ndaj Albion Kurtajt dhe u përjashtua nga loja.
Gjilani kthehet në lojë
Gjilani është kthyer në lojë në duelin ndaj Ferizajt dhe e ka ngushtuar rezultatin në 2:1.
Sulmuesi shtatlartë, Senad Jaroviq, realizoi në minutën e 72-të me gjuajtje të saktë nga zona. Ferizajasit protestuan për ndërhyrje të palejuar.
Por, goli u pranua edhe pas rishikimit të situatës në VAR.
Rezultati është 2:1 në të mirë të Ferizajt.
Ferizajt i anulohet goli i tretë
Ferizaj ka shënuar edhe një tjetër gol ndaj Gjilanit në udhëtim, në ndeshjen e xhiros së nëntë të Superligës, por që është anuluar nga gjyqtari Dardan Çaka.
Pesë minuta pasi nisi pjesa e dytë, Qlirim Avdulli shënoi për 3:0, pas asistimit të përkryer të kapitenit Edon Sadriut.
Por, gjyqtari Çaka e rishikoi situatën në VAR dhe pa ndërhyrje të palejuar gjatë ndërtimit të aksionit.
Ferizaj nuk ndalet, e shënon edhe golin e dytë
Ferizaj e ka shënuar edhe golin e dytë në udhëtimin ndaj Gjilanit.
Për 2:0 shënoi qendërsulmuesi Abdeen Temitope Abdul, në minutën e 44-t.
Ai realizoi me kokë nga afërsia, në portën e portierit Kenan Haxhihamza.
Me rezultatin 2:0 në të mirë të Ferizajt është mbyllur pjesa e parë.
Golin e parë e realizoi Edon Sadriu. Kapiteni i Ferizajt realizoi në minutën e 14-të.
Ndeshja i takon xhiros së nëntë të Superligës së Kosovës në futboll.
Ferizaj befason Gjilanin, shënon Sadriu
Kapiteni i Ferizajt, Edon Sadriu, e ka kaluar në epërsi Ferizajn ndaj Gjilanit, në ndeshjen e xhiros së nëntë të Superligës së Kosovës në futboll.
Ndeshja po luhet në terrenin me bar sintetik në Gjilan.
Sadriu e kaloi në zonë mbrojtësin Besir Ramadani dhe më pas realizoi me gjuajtje të saktë për 1:0.
Ai shënoi në minutën e 14-të.
