Epiteti i lojtarit më të mirë të xhiros së 11-të në Superligën e Kosovës në futboll i ka takuar mesfushorit të Dritës, Albert Dabiqajt.
Dabiqaj u zgjodh më i miri nga Komisioni i Veteranëve të Futbollit.
Mesfushori i skuadrës gjilanase realizoi dy gola në fitoren ndaj Prishtinës, 3:0.
“Ndeshja kundër Prishtinës është gjithmonë derbi. Ne po vinim nga 3 barazime, por dje me shumë angazhim, sakrificë dhe mund, arritëm ta mposhtim Prishtinën, me anën e punës që kemi bërë në stërvitje”, ka theksuar Dabiqaj, teksa ka folur edhe për synimet e klubit.
“Synimi ynë dihet, të shpallemi kampion dhe nuk kemi asnjë tjetër në mendje. Atmosfera në ekip është e mrekullueshme. Kemi një shtab teknik dhe lojtarë të mrekullueshëm, teksa për kryesimin dihet se sa janë të sinqertë me lojtarët. Të shpallesh më i miri i javës është privilegj dhe kënaqësi. Falënderoj bashkëlojtarët, stafin e trajnerëve dhe komisionin për vlerësimin. Ky çmim më jep më shumë motiv për ndeshjet e ardhshme”, ka deklaruar Dabiqaj për faqen zyrtare të FFK-së.
