Atalanta e Berat Gjimshitit ka pësuar humbje pas një penalltie të shënuar nga skuadra e Ardon Jasharit, Club Brugge, në minutën e tretë të kohës shtesë.
Ishte edhe momenti që e vendosi të mërkurën mbrëma sfidën e parë të plejofit të Ligës së Kampionëve mes Club Brugges dhe Atalantas, që përfundoi 2:1.
Skuadra belge kaloi në epërsi nga minuta e 15-të kur shënoi sulmuesi Ferran Jutgla.
Italianët, fitues në fuqi të Ligës së Evropës, i barazuan shifrat me Mario Pashaliqin, katër minuta pa u mbyllur pjesa e parë.
Por në minutën e parë të kohës shtesë, mbrojtësi i Atalantas, Isak Hien, bëri ndërhyrje të ashpër në zonë.
Gjyqtari Halil Umut Meler sinjalizoi në pikën e bardhë pas rishikimit të situatës në VAR.
Nga 11-të metërshi i saktë ishte Gustaf Nilsson, që nuk e shpërdoroi mundësinë për 2:1.
Pati shumë protesta nga mysafirët për atë penallti, por gjyqtari kryesor nuk e ndërroi vendimin.
Pas ndeshjes pati tensione në fushë, ku ishte i përfshirë edhe kapiteni i Shqipërisë, Berat Gjimshiti.
Jashari e Gjimshiti luajtën në tërë ndeshjen për skuadrat e tyre.
Ndeshja kthyese luhet më 18 shkurt.
