Bayern Muncheni i është afruar shumë titullit të kampionit në Bundesligë.
Bayerni pas 30 ndeshjeve është lider me 72 pikë. Ka tetë pikë më shumë se Bayer Leverkuseni që është në pozitën e dytë. Deri në fund janë edhe katër xhiro.
Bayerni mund ta sigurojë titullin që në fundjavë, kur në program është xhiroja e 31-të. Në rast të fitores së Bayernit dhe humbjes së Leverkusenit, bavarezët do të festonin të shtunën.
Bayerni është fare pranë që ta fitojë titullin e 34-t të Gjermanisë.
Është klubi më i suksesshëm në futbollin gjerman.
Bayerni të shtunën nga ora 15:30 e pret Mainzin.
Skuadra bavareze është e pamposhtur në pesë ndeshjet e fundit në ligë.
Mainzi ka 47 pikë dhe renditet në pozitën e gjashtë. Nëse e ruan këtë pozitë deri në fund, atëherë edicionin e ardhshëm do të paraqitet në kupat evropiane.
Të shtunën nga ora 15:30 do të zhvillohen edhe katër ndeshje të tjera.
Bayer Leverkuseni luan në shtëpi me Augsburgun. Skuadra e Granit Xhakës duhet të shënojë fitore për ta mbajtur të hapur garën për titull. Leverkuseni është kampion në fuqi, por këtë edicion po e humbë garën me Bayernin. Augsburgu renditet i dhjeti me 43 pikë.
