Trajneri i futbollit, Erdin Hashani, ka thënë se Spanja është pak më favorite se Anglia në prag të finales së “Euro 2024”, e cila zhvillohet të dielën nga ora 21:00 në Berlin.
Sipas Hashanit, ajo që e bën pak më favorite Spanjën është rruga që e ka pasur deri në finale.
“Spanja ka qenë në ‘grupin e vdekjes’ dhe i ka pas të gjitha fitore. Edhe gjatë rrugës i ka pas kundërshtarët më të fortë se Anglia”, ka thënë ai në “Interaktiv” të KTV-së.
Por trajneri thotë se Anglia ka filluar të këndellet pas fitores ndaj Zvicrës me penallti.
“Ndryshimet e Gareth Southgate në formacion, nga 4-2-3-1 në 4-3-2-1, e kanë bërë Anglinë më të fortë. Pasi ka arritur në finale, Anglia nuk e ka më ngarkesën psiqike që kishte më herët, veçanërisht nga mediat”, ka shtuar Hashani.
Sipas tij, përballja kryesore mes Spanjës dhe Anglisë do të jetë në mesfushë.
“Nëse arrin Anglia me dominu mesfushën, do ta fitojë ndeshjen”, ka deklaruar Hashani.
