Zelensky thotë se lufta do të “përfundojë më shpejt” me Trumpin si president

Presidenti ukrainas, Volodymyr Zelensky, thotë se është i sigurt se lufta me Rusinë do të “mbarojë më shpejt” me Donald Trumpin si president i Shteteve të Bashkuara të Amerikës.

Zelensky tha se kishte një “shkëmbim konstruktiv” me Trumpin gjatë bisedës telefonike qw pati  pas fitores së tij në zgjedhjet presidenciale në SHBA.

Ai nuk tha nëse Trump kishte bërë ndonjë kërkesë në lidhje me bisedimet e mundshme me Rusinë, por tha se nuk kishte dëgjuar asgjë nga ai që ishte në kundërshtim me qëndrimin e Ukrainës.

Trump ka thënë vazhdimisht se prioriteti i tij është t’i japë fund luftës dhe të ndalojë atë që ai thotë se është një shterim i burimeve amerikane, raporton BBC.

“Është e sigurt se lufta do të përfundojë më shpejt me politikat e ekipit që tani do të udhëheqë Shtëpinë e Bardhë. Kjo është qasja e tyre, premtimi i tyre ndaj qytetarëve të tyre”,  tha Zelensky në një intervistë për median ukrainase “Suspilne”.

Ai shtoi se Ukraina “duhet të bëjë gjithçka që kjo luftë të përfundojë vitin e ardhshëm me mjete diplomatike”.

Ai tha se legjislacioni amerikan e lejon atë të takohet me Trumpin vetëm pas inaugurimit të tij në janar.
Trump dhe Zelensky kanë pasur prej kohësh një marrëdhënie të trazuar. Trump u fajësua në vitin 2019 për akuzat se ai i bëri presion Zelenskyt për të zbuluar informacione të dëmshme për familjen e Bidenit.

Pavarësisht kësaj, Trump ka këmbëngulur se ai kishte një marrëdhënie shumë të mirë me Zelenskyn.

Kur dyshja u takuan në New York në shtator, Trump tha se “mësoi shumë” nga takimi dhe tha se do ta zgjidhte luftën “shumë shpejt”.

Trump ende nuk ka zbuluar se si synon t’i japë fund luftës.

Kundërshtarët e tij demokratë e kanë akuzuar atë se qasja e tij ndaj luftës është një dorëzim për Ukrainën që do të rrezikojë të gjithë Evropën.

Por kancelari gjerman Olaf Scholz, i cili foli me Trumpin pas fitores së tij në zgjedhje, u tha mediave gjermane se udhëheqësi i ardhshëm i SHBA-së kishte pozicion “më të mirë” për luftën sesa supozohej zakonisht.

Në fillim të këtij viti, Dhoma e Përfaqësuesve e SHBA-së miratoi një pako ndihme ushtarake prej 61 miliardë dollarësh për Ukrainën.

SHBA-ja ka qenë furnizuesi më i madh i armëve për Ukrainën.