Zelensky thotë se janë kapur shtetas kinezë duke luftuar për Rusinë

Presidenti ukrainas Volodymyr Zelensky, ka thënë se forcat ukrainase kanë kapur dy burra kinezë që po luftonin në anën e Rusisë në Ukrainën lindore, duke kërcënuar potencialisht një përpjekje të brishtë për paqe në luftën trevjeçare.

Pekini është një aleat i ngushtë i Moskës, por nuk dihet publikisht nëse ka ndihmuar drejtpërdrejt në pushtimin në shkallë të plotë nga ana e Rusisë, raporton Reuters.

Duke shkruar në X, ku ka postuar një video të njërit prej burrave, Zelensky ka thënë se Kievi ka "informacion që sugjeron se ka shumë më tepër shtetas kinezë në njësitë e pushtuesit" dhe se ai kishte urdhëruar zyrtarët të merrnin një përgjigje nga Pekini.

“Përfshirja e Kinës nga Rusia, së bashku me vendet e tjera, drejtpërdrejt apo tërthorazi, në këtë luftë në Evropë, është një sinjal i qartë se Putini synon të bëjë gjithçka, përveç përfundimit të luftës”, ka shkruar Zelensky, siç raportohet nga Reuters.

Ministria e Jashtme e Ukrainës ka thirrë të ngarkuarin me punë të Kinës në Kiev për të shpjeguar incidentin.