-
Përktheu:
Flutura Gashi-Mehmeti
- 1 prill 2025 19:12
- Shpërndaje në:
Bashkimi Evropian ka një “plan të fortë” për t'u kundërpërgjigjur ndaj tarifave të vendosura nga presidenti amerikan, Donald Trump, por do të preferonte të negocionte, ka deklaruar presidentja e Komisionit Evropian, Ursula von der Leyen.
Trump, i cili ka ndryshuar tetë dekada sigurie në lidhje me marrëdhëniet transatlantike që nga marrja e detyrës, ka kërcënuar me tarifa për mallrat nga e gjithë bota, duke nisur nga e mërkura. Administrata e tij, në mars ka vendosur tarifa për çelikun dhe aluminin e importuar dhe ka thënë se tarifat më të larta për veturat do të hyjnë në fuqi të enjten.
Von der Leyen, duke folur në Parlamentin Evropian të martën, ka thënë se sektorët e ardhshëm që do të përballen me tarifat do të jenë gjysmëpërçuesit, farmaceutikët dhe druri.
Ajo ka thënë se shumë evropianë u ndjenë "plotësisht të dëshpëruar" nga njoftimet e SHBA-së.
"Evropa nuk e ka filluar këtë konfrontim. Ne nuk duam domosdoshmërisht të hakmerremi, por nëse është e nevojshme ne kemi një plan të fortë për t'u kundërpërgjigjur dhe do ta përdorim atë”, ka thënë ajo, raporton The Guardian.
Pas shpalljes së tarifave të çelikut dhe aluminit në mars, komisioni ka njoftuar se do të vendoste kundërmasa për deri në 26 miliardë euro mallra amerikane. Këto përfshijnë rivendosjen e tarifave për 4.5 miliardë dollarë mallra amerikane, të tilla si xhinset dhe motoçikletat Harley-Davidson, të cilat u pezulluan gjatë presidencës së Joe Bidenit.
Masat do të zbatohen në mesin e prillit, pasi ekzekutivi i BE-së ka zgjedhur të shtyjë datën fillestare të 1 prillit, në mënyrë që t'i përputhë ato me hapat e tjerë dhe të rregullojë pozicionin e BE-së midis 27 vendeve anëtare.
Ekzekutivi i BE-së po konsulton shtetet anëtare për një rund të dytë të tarifave, me vlerë rreth 18 miliardë euro, që mbulon çelikun, aluminin, shpendët, mishin e viçit, ushqimet e detit dhe arrat.
Megjithatë, ajo po përballet me presionin e kryeqyteteve evropiane për të mbrojtur interesat kombëtare. Franca, për shembull, është e shqetësuar për ndikimin në verërat dhe pijet alkoolike franceze nëse komisioni synon burbonin amerikan. Kryeministri i saj, François Bayrou, i ka përshkruar tarifat e propozuara të BE-së për burbonin e Kentakit si një hap të gabuar, pas takimeve me industrinë franceze të konjakut.
Sipas marrëdhënieve tregtare BE-SHBA, me vlerë 1.6 trilion euro në vitin 2023, blloku evropian eksporton më shumë mallra përtej Atlantikut sesa SHBA-ja. Eksporti përbëhet kryesisht nga veturat, ilaçet dhe produktet farmaceutike.
Zyrtarët e BE-së nuk kanë përjashtuar masat hakmarrëse ndaj shërbimeve amerikane, të tilla si pezullimi i të drejtave të pronësisë intelektuale. Në teori, hakmarrja mund të synojë kompanitë e teknologjisë amerikane, bankat dhe ofruesit e shërbimeve financiare.
