Disa pjesë të Indisë veriore po përjetojnë një valë të fortë dhe të zgjatur të të ftohtit që ka nxjerrë jashtë përdorimit jetën normale.
Mjegulla e dendur ka shkaktuar vonesa në më shumë se 100 fluturime dhe dhjetëra trena, duke shkaktuar kaos në aeroporte dhe stacione hekurudhore, shkruan BBC-ja.
Autoritetet në kryeqytetin e Delhit u kanë kërkuar shkollave të zgjasin pushimet dimërore dhe të anulojnë mësimet.
Temperatura minimale në disa pjesë të qytetit ka rënë në 1.9C të dielën.
Shtetet e tjera veriore janë përballur gjithashtu me një valë akute të ftohtë, me temperatura që bien në -6C (21F).
Departamenti i Meteorologjisë u ka kërkuar njerëzve që “të shmangin ose kufizojnë aktivitetet në natyrë” derisa të përmirësohen kushtet e motit. Ai gjithashtu ka paralajmëruar njerëzit që të jenë të kujdesshëm gjatë vozitjes përmes mjegullës së dendur.
I ftohti i rëndë pritet gjithashtu të shkaktojë probleme shëndetësore, veçanërisht në Delhi, i cili gjithashtu përjeton nivele të rënda ndotjeje gjatë muajve të dimrit.
I ftohti ekstrem ka qenë veçanërisht i vështirë për popullsinë e pastrehë të Indisë, të cilët shpesh flenë buzë rrugës dhe në stacione hekurudhore.
Të dielën, Delhi pa një nga ditët më të mjegullta të sezonit deri më tani, me një mjegull të dendur që mbuloi qytetin për disa orë.
Raportet thanë se dukshmëria e dobët çoi në vonesa në më shumë se 100 fluturime në aeroportin e Delhit, derisa disa u detyruan të devijoheshin në vende të tjera. Hekurudhat indiane, të cilat transportojnë rreth 23 milionë pasagjerë çdo ditë, thanë se rreth 29 trena po qarkullonin vonë në Indinë veriore.
Kushtet e mjegullës kanë vazhduar edhe të hënën, ku automjetet janë parë duke lëvizur ngadalë në rrugë. Linja ajrore vendase IndiGo shkroi në Twitter se oraret e fluturimit u ndikuan “për shkak të mjegullës së dendur dhe dukshmërisë së dobët” në Delhi dhe këshilloi pasagjerët të kontrollonin statusin e tyre të fluturimit përpara se të niseshin për në aeroport.
Zyrtarët kanë thënë se presin që vala e të ftohtit të fillojë të ulet nga 10 janari.
