Ushtria izraelite ka tërhequr të gjitha trupat tokësore nga jugu i Rripit të Gazës, me përjashtim të një brigade, ka bërë të ditur të dielën një zëdhënës ushtarak, raporton agjencia “AP”.
Ushtria nuk dha menjëherë detaje të tjera. Mbetet e paqartë nëse tërheqja e trupave do ta vononte një inkursion të planifikuar prej kohësh në qytetin jugor të Gazës, Rafah, për të cilin udhëheqësit izraelitë kanë thënë se është i nevojshëm për ta eliminuar Hamasin.
Tërheqja vjen teksa Egjipti po përgatitet të presë një raund të ri bisedimesh që synojnë arritjen e një armëpushimi dhe marrëveshjes për lirimin e pengjeve.
Ofensiva e Izraelit në Gaza, e nisur pas sulmit të Hamasit ndaj Izraelit gjashtë muaj më parë më 7 tetor, është fokusuar muajt e fundit në jug të enklavës palestineze.
Rafah është bërë streha e fundit për më shumë se një milion palestinezë.
Më shumë se 250 pengje u kapën dhe rreth 1 mijë e 200 njerëz u vranë gjatë sulmit të 7 tetorit nga militantët e Hamasit brenda territorit izraelit, sipas të dhënave izraelite. Më shumë se 33 mijë palestinezë janë vrarë në ofensivën izraelite, sipas ministrisë së shëndetësisë në Gaza.
