“Tradhtia kombëtare” po armiqëson fqinjët në Ukrainë

Frika dhe dyshimi kërcënojnë rrugët e Khersonit, një port jugor që ishte i pushtuar nga trupat ruse për më shumë se tetë muaj përpara se ato të dëboheshin nga forcat ukrainase në nëntor. Qyteti është tani fokusi i bombardimeve të pamëshirshme ruse. Gjashtë muaj pas pushtimit, fqinjët nuk u besojnë fqinjëve. Tradhtarët mund të jenë kudo

Valentyna Haras thotë se nuk është tradhtare.

Megjithatë, muret e kopshtit në qytetin ukrainas Kherson janë të mbuluara me mbishkrime që e shënojnë atë si një bashkëpunëtore ruse. "Rashist" - një përzierje ukrainase e fashistëve rusë - është skalitur me bojë të kuqe. Shkronja "Z" - simbol i mbështetjes për makinën luftarake të Moskës - janë lakuar mureve.

Frika dhe dyshimi kërcënojnë rrugët e Khersonit, një port jugor që ishte i pushtuar nga trupat ruse për më shumë se tetë muaj përpara se ato të dëboheshin nga forcat ukrainase në nëntor. Qyteti është tani fokusi i bombardimeve të pamëshirshme ruse.

Mbisundim i mosbesimit

Gjashtë muaj pas pushtimit, fqinjët nuk u besojnë fqinjëve. Tradhtarët mund të jenë kudo.

Haras, administratore e qarkut, tha se katër ushtarë ukrainas trokitën në derën e saj më 26 nëntor, në ditën pasi trupat ruse u larguan dhe e akuzuan atë për bashkëpunim, një krim që dënohet me një dënim maksimal prej 10-15 vjetësh. Ata kontrolluan shtëpinë e saj dhe sekuestruan telefonin dhe kompjuterin, duke përmendur ankesat nga fqinjët se i kishte inkurajuar banorët t'u nënshtroheshin pushtuesve dhe të merrnin pasaportat ruse, shtoi ajo.

74-vjeçarja u mor në pyetje më pas nga policia, megjithëse nuk është arrestuar apo akuzuar për ndonjë krim. Ajo mohon të gjitha akuzat ndaj saj dhe tha se nuk mund ta kuptojë pse e cilësuan si bashkëpunëtore, duke shtuar se ishte lumturuar kur rusët u dëbuan.

"Sinqerisht, nuk e di", tha ajo me lot jashtë shtëpisë së saj. "Ata nuk gjetën asgjë."

Fqinja Iryna Nechevilova dha një rrëfim tjetër.

"Ajo mbështeti hapur rusët dhe u tha të gjithëve se Rusia ishte e mrekullueshme, se ishte e tmerrshme nën sundimin ukrainas", tha Nechevilova. "Njerëzit prisnin që ajo të zhdukej menjëherë. Ne kemi shkruar akuza kundër saj për shumë muaj. Por ajo nuk u largua dhe njerëzit u tronditën”.

Policia në stacionin lokal ku ajo tha se ishte marrë në pyetje nuk pranoi të komentonte mbi rastin. Ushtria e Ukrainës nuk iu përgjigj menjëherë një kërkese për koment.

Reuters nuk ishte në gjendje të verifikonte në mënyrë të pavarur versionin e ngjarjeve të Harasit ose Nechevilovat.

Akuza të bazuara e të pabazuara

Akuzat për bashkëpunim janë bërë një tipar i jetës së përditshme në të gjithë Ukrainën pasi forcat ruse janë larguar nga zona të territorit që dikur kishin pushtuar.

Rusia ka humbur më shumë se 40 për qind të territorit që pushtoi pasi filloi një pushtim në shkallë të plotë në shkurt të vitit të kaluar, duke e kthyer nën kontrollin e pothuajse një të pestës së vendit duke përfshirë Krimenë, thekson Oleksandr Musiyenko, analist ushtarak me bazë në Kiev.

Më shumë se 5.300 raste bashkëpunimi janë regjistruar në të gjithë vendin, sipas faqes së internetit të prokurorit të përgjithshëm. Nuk ishte e qartë se në çfarë faze ishin rastet dhe zyra e prokurorit të përgjithshëm nuk iu përgjigj menjëherë një kërkese për koment.

Tensionet në Kherson janë ashpërsuar nga granatimet pothuajse të përditshme nga trupat ruse të vendosura në anën e kundërt të lumit Dnjepër. Disa familje janë të ndara, me anëtarë që jetojnë në anë të ndryshme të lumit.

Në një ditë të bombardimeve veçanërisht të rënda në fillim të majit, të paktën 23 njerëz u vranë në qytet; shumë dritare janë ende të mbyllura dhe ndërtesa pjesërisht të shkatërruara.

Paqartësia ligjore

Kur rusët pushtuan Khersonin, mbajtën një referendum nëse qyteti dhe rajoni i tij duhet të bëhen pjesë e Rusisë, për të cilin Moska tha se mori mbështetje të fuqishme lokale, megjithëse Kievi dhe vendet perëndimore e hodhën poshtë votimin si një mashtrim.

Nëse kundërofensiva e premtuar e Ukrainës i zmbraps rusët më tej, më shumë fshatra, qyteza dhe qytete ka të ngjarë të pësojnë atë që po përjeton Khersoni sot.

Rastet e bashkëpunimit mund të tregojnë për zgjedhjet e vështira që njerëzit duhet të bëjnë kur përpiqen të mbijetojnë nën okupim.

Për shembull, disa fermerë mund të përballen me ndjekje penale, sepse i regjistruan fermat e tyre sipas rregullave ruse nën okupim vetëm për të mbajtur bizneset e tyre.

Këshilli Agrar Mbarëukrainas përmend rastin e një pronari ferme që ia ktheu shpinën fermës në rajonin Zaporizhzhia pasi zona u pushtua nga forcat ruse. Ai ua la biznesin punëtorëve të tij, të cilët duhej të regjistroheshin te rusët dhe të merrnin pasaportat ruse dhe ka frikë se mund të ndiqen penalisht pasi pushtimi të përfundojë.

Disa grupe lobimi thonë se ligjet që rregullojnë bashkëpunimin janë të paqarta dhe duhet të ndryshohen për të pasqyruar realitetin e njerëzve që përpiqen të vazhdojnë të sigurojnë jetesën ndërsa janë nën okupim. Ose, siç tha Këshilli Agrar Mbarukrainas, bëni dallimin midis "kush është tradhtar dhe kush punon për hir të mbijetesës".