-
Përktheu:
Flutura Gashi-Mehmeti
- 28 gusht 2024 16:02
- Shpërndaje në:
Shërbimi i aplikacionit të mesazheve “Telegram”, shefi i të cilit është arrestuar në Francë të shtunën, kishte refuzuar vazhdimisht të bashkohej me programet ndërkombëtare që synojnë zbulimin dhe heqjen e materialeve të abuzimit të fëmijëve në internet, ka mësuar BBC-ja.
Aplikacioni nuk është anëtar as i Qendrës Kombëtare për Fëmijët e Zhdukur dhe të Shfrytëzuar (NCMEC) dhe as i “Internet Watch Foundation” (IWF), të cilat që të dyja punojnë me shumicën e platformave në internet për të gjetur, raportuar dhe hequr materiale të tilla.
Themeluesi dhe shefi ekzekutiv i aplikacionit, Pavel Durov i cili ka më shumë se 950 milionë përdorues të regjistruar, vazhdon të mbetet në paraburgim në Francë.
Miliarderi Durov është arrestuar për shkelje të dyshuara në lidhje me mungesën e moderimit në platformë.
Sipas zyrtarëve, 39-vjeçari akuzohet për mosbashkëpunim me forcat e rendit për trafik droge, përmbajtje seksuale për fëmijë dhe mashtrim.
Telegrami thotë se moderon në mënyrë proaktive përmbajtje të dëmshme në platformën e saj, duke përfshirë materialet e abuzimit me fëmijët. Kompania këmbëngul se moderimi i saj është "brenda standardeve të industrisë dhe vazhdimisht po përmirësohet".
Megjithatë, ndryshe nga të gjitha rrjetet e tjera sociale, ai nuk është i regjistruar në programe si CyberTipline i NCMEC, i cili ka më shumë se 1,600 kompani të regjistruara në internet.
Firmave me bazë në SHBA u kërkohet ligjërisht të regjistrohen, por 16% e kompanive që marrin pjesë janë jo me bazë në SHBA.
Telegram ndodhet në Dubai, atje ku jeton Durov.
Shumica dërmuese e raportimeve të materialeve të abuzimit seksual të fëmijëve erdhën nga gjigantët e teknologjisë dhe rrjetet sociale, duke përfshirë: Facebook, Google, Instagram, TikTok, Twitter (X), Snapchat dhe WhatsApp.
BBC-ja ka kuptuar se NCMEC i ka kërkuar në mënyrë të përsëritur Telegramit që të bashkohet për të ndihmuar në trajtimin e materialit të abuzimit seksual të fëmijëve (CSAM), por platforma kishte injoruar kërkesat.
Telegrami gjithashtu refuzon të punojë me “Internet Watch Foundation”, i cili është ekuivalenti i NCMEC në Mbretërinë e Bashkuar.
Një zëdhënës i IWF-së ka thënë se "megjithë përpjekjet për t'u angazhuar në mënyrë proaktive me Telegramim gjatë vitit të kaluar, ata nuk janë anëtarë të IËF-së dhe nuk marrin asnjë nga shërbimet tona për të bllokuar, parandaluar dhe penguar ndarjen e imazheve të abuzimit seksual të fëmijëve".
BBC-ja ka kontaktuar Telegramin për koment në lidhje me refuzimin e tij për t'u bashkuar me skemat e mbrojtjes së fëmijëve, dhe mori një përgjigje pas publikimit e cila është përfshirë në këtë tekst.
Një normë tjetër me të cilën Telegrami nuk përputhet në mënyrën e zakonshme është edhe Raportimi i Transparencës.
Çdo gjashtë muaj, rrjetet sociale publikojnë një listë të të gjitha përmbajtjeve të hequra për shkak të kërkesave të policisë.
Shumica e rrjeteve të tjera sociale, duke përfshirë aplikacionet e Metës, Snapchat dhe TikTok publikojnë raportet e tyre në internet me vitet e mëparshme ku mund të referohesh.
Telegrami nuk ka një uebsajt të tillë.
Telegrami ka gjithashtu një sistem të pazakontë edhe në raport me mediat. Mënyra e kontaktit është përmes një roboti të automatizuar në aplikacion, i cili BBC-së nuk i është përgjigjur kurrë gjatë muajve të përpjekjeve për të marrë një përgjigje ndaj kërkesave të ndryshme.
LEXO EDHE:
