Suedia dhe Finlanda drejt lehtësimit të ligjeve strikte të alkoolit

Suedia dhe Finlanda kanë lëvizur për të lehtësuar ligjet strikte që rregullojnë shitjen e alkoolit, por duke ruajtur monopolet më të gjera shtetërore.

Qeveria në Stokholm synon të lejojë ato që i quan "shitjet e fermave", në të cilat prodhuesit e alkoolit ofrojnë pije direkt për klientët që vizitojnë, raporton BBC.

Ndërkohë, parlamenti i Finlandës ka miratuar shitjen e pijeve të fermentuara si birra, vera dhe mushti me përmbajtje alkooli deri në 8% në supermarkete, nga kufiri aktual prej 5.5%.

Në Suedi dhe Finlandë, alkooli në përgjithësi mund të blihet vetëm në dyqanet shtetërore ose në bare dhe restorante të licencuara.

Këto dy shtete janë të vetmet vende të BE-së që kanë monopole të alkoolit. Praktika e gjatë është pjesë e një tradite më të gjerë nordike që synon të kufizojë konsumin në interes të shëndetit publik.

Deputetët e Finlandës votuan me 102 kundër 80 pro ligjit të pijeve të fermentuara, derisa të gjithë anëtarët e një partie në koalicionin qeverisës, “Kristian Demokratët”, që votuan kundër.

Ata që kundërshtonin legjislacionin e justifikuan qëndrimin e tyre për arsye shëndetësore, mes frikës për një rritje të konsumit të alkoolit.

Birrat më të forta, verërat dhe mushti do të jenë të disponueshme në dyqane që në fillim të javës së ardhshme. Megjithatë, ligji i ri nuk mbulon pijet e distiluara.

Ndërkohë qeveria suedeze e qendrës së djathtë po planifikon të ndihmojë sipërmarrësit duke hapur shitje në shkallë të vogël të verës, birrës, mushtit dhe pijeve alkoolike për ata që vizitojnë ambientet e prodhuesve.

Ministrat thonë se kjo do të ndihmojë në krijimin e "kujtimeve të shkëlqyera".

Masa, nëse miratohet, pritet të hyjë në fuqi në vitin 2025.

Të dy vendimet mund të kenë nevojë t'i referohen Komisionit Evropian, për të kontrolluar se nuk do të shkelin ligjin e konkurrencës.

Komisioni ka shprehur tashmë kundërshtime ndaj vendimit të Finlandës për të përjashtuar pijet e distiluara nga ligji i tij i ri.