Kryeministri britanik, Keir Starmer, ka mbërritur në Shtëpinë e Bardhë ku është pritur nga presidenti Donald Trump. BBC-ja raportoi se takimi nisi me një shtrëngim duarsh, derisa s'u shprehën asgjë. Trump u pyet nga gazetarët nëse mund të arrihet një marrëveshje për paqe mes Rusisë dhe Ukrainës, ai u përgjigj me “Po, ne mundemi. Do ta bëjmë". Trump e ka cilësuar vend të veçantë Britaninë e Madhe, e kryeministrin “njeri të veçantë”. Ai ka shtuar se në një të ardhme të afërt do ta vizitojë atë vend. Gjithçka rreth kësaj vizite dhe deklaratat e liderëve i gjeni këtu:
Britania e gatshme të dërgojë trupa paqeruajtëse në Ukrainë
Photo: Associated Press
Kryeministri i Britanisë, Keir Starmer, ai ka vlerësuar përpjekjet e Trumpit për të arritur një marrëveshje për paqe në Ukrainë dhe rreth botës, por ka shtuar se duhet ta bëjnë siç duhet.
Ai ka deklaruar se “Ne duhet të fitojmë paqen, dhe kjo është çfarë duhet të bëjmë, sepse nuk mund të jetë paqe që shpërblen agresorin... duke i dhënë kurajë regjimeve si në Iran, ne pajtohemi se historia duhet të jenë në anën e paçebërësit, dhe jo pushtuesit, pra shanset duhet të jenë më të larta”.
Rreth shpenzimeve të mbrojtjes ai ka shtuar se “në këtë epokë të re, ju keni të drejtë Evropa duhet të zgjohet... dhe Britania është e gatshme plotësisht”, duke ju referuar rritjes së shpenzimeve në mbrojtje.
Ndërsa rreth përfshirjes së Britanisë në marrëveshjen e paqes në Ukrainë ai ka deklaruar se “jam i qartë se Britania e Madhe është e gatshme të hyj me trupa dhe avionë për të mbështetur një marrëveshje, duke punuar bashkë me aleatët tanë, sepse ajo është mënyra e vetme që paqja të zgjasë”.
Trump: Armëpushimi mes Rusisë dhe Ukrainës do t’i hapte një marrëveshjeje afate gjate
Presidenti i Shteteve të Bashkuara të Amerikës, Donald Trump, ka deklaruar se ai dhe kryeministri i Britanisë, Keir Starmer kanë diskutuar rreth hapave për të arritur armëpushimin në luftën e Ukrainës gjatë takimit të tyre në Shtëpinë e Bardhë.
“Sa diskutova me kryeministrin, Starmer, hapi i radhës që do të bëjmë është drejt një armëpushimi shumë të arritshëm, shpresojmë se ajo mund të ndodh shpejt”, ka deklaruar Trumpi gjatë konferencës për media me liderin britanik.
“Kjo do të hapë rrugën për marrëveshje paqeje afat gjatë që do të rikthej stabilitetin në Evropën Lindore dhe me shpresë se do të siguroj se lufta të tilla të tmerrshme nuk do të ndodhim kurrë në tokën evropiane, ose askund tjetër”, ka shtuar Trumpi.
Rreth marrëveshjes për minerale me Ukrainën, presidenti ka deklaruar se SHBA-ja pritet të nënshkruaj nesër në Shtëpinë e Bardhë me presidentin e Ukrainës, Volodymyr Zelensky, dhe se marrëveshja “do të ofroj bazën për një marrëdhënie të ardhshme më të qëndrueshme” në mes SHBA-së dhe Ukrainës.
Përgatiti: Shkëlzen Dema
Trumpi flet për mundësinë e rimarrjes së territorit të pushtuar ukrainas
Presidenti i Shteteve të Bashkuara të Amerikës, Donald Trump, ka deklaruar se SHBA-ja do të shohë nëse Ukraina mund të rimarrë pjesë të caktuara të territorit që Rusia i ka pushtuar që nga fillimi i luftës, veçanërisht në “bregdet” si pjesë e negociatave më të gjera të paqes.
“Po, janë shumë zona që janë marrë, po kemi folur rreth saj, pjesë e madhe e bregdetit është marrë, dhe ne do të flasim rreth saj, dhe do të shohim nëse mund ta marrim përsëri, ose të rimarrim pjesë të mëdha të saj për Ukrainën, nëse është e mundur, do të shohim rreth saj”, ka deklaruar Trumpi.
Presidenti i Shteteve të Bashkuara të Amerikës, Donald Trump, ka deklaruar se britanikët “nuk kanë shumë nevojë për ndihmë” kur është pyetur nëse SHBA-ja do t’i ndihmonte ata nëse sulmohen nga Rusia derisa do të garantonin paqen në Ukrainës.
“E dini, unë gjithmonë kam menduar për britanikët se ata nuk kanë shumë nevojë për ndihmë”, ka deklaruar Trumpi në Zyrën Ovale gjatë takimit me kryeministrin e Britanisë së Madhe, Keir Starmer, në Shtëpinë e Bardhë.
“Ata mund t’i dalin zot vetës shumë mirë”, ka shtuar Trumpi.
“Duket si e paqartë, por nuk është e paqartë, e dini, britanikët kanë qenë ushtarë të jashtëzakonshëm, ushtri e jashtëzakonshme, dhe ata mund ti dalin zot vetës”, ka shtuar ai.
Trumpi ka folur edhe për shpenzimet e NATO-s.
“Katastrofa në Ukrainë na tregon saktësisht pse është e rëndësishme për Mbretërinë e Bashkuar dhe partnerët e tjerë të NATO-s të bëjnë investime të mëdha në kapacitetet mbrojtëse, në shumë raste 4% apo 5% të BPV, do të ishte e përshtatshme”, ka deklaruar presidenti amerikan.
Trumpi nuk e dinë çfarë është AUKUS-i
Në Zyrën Ovale në Shtëpinë e Bardhë, presidenti i Shteteve të Bashkuara të Amerikës, Donald Trump, nuk e ka ditur se çfarë është marrëveshja AUKUS.
AUKUS është një pakt ushtarak në mes Australisë, Britanisë dhe SHBA-së, i fokusuar me të madhe në furnizimin me nëndetëse bërthamore për Australinë. Ajo ishte arritur në vitin 2021, kur Joe Biden ishte president.
I pyetur nëse do të diskutonte rreth AUKUS-it me Starmerin, Trumpi është përgjigjur me “çfarë do të thotë ajo?”.
Pasi iu shpjegua, ai tha se “do të diskutohet”.
Starmer i kundërpërgjigjet Trumpit: Ndihmat tona për Ukrainën ishin dhuratë
Kryeministri i Britanisë, Keir Starmer ka përmirësuar presidentin e Shteteve të Bashkuara të Amerikës, Donald Trumpi, rreth ndihmës së Britanisë ndaj Ukrainës duke thënë se ndihma e dhënë ishte dhuratë e Britanisë për Ukrainën gjatë luftës.
I pyetur rreth takimit të ardhshëm me presidentin e Ukrainës, Volodymyr Zelenksy, Trumpi ka deklaruar se marrëdhënia e tyre është pak “testuese” sepse “ne donim të kishim pak prej asaj që vendet evropiane kishin”.
“E dini, ata i marrin prapë paratë e tyre duke dhënë para, ne nuk i marrim paratë e tona prapë”, ka deklaruar Trumpi rreth ndihmës për Ukrainën.
Pastaj Starmer ka përmirësuar Trumpin duke thënë se “ne nuk do t’i marrim tonat, një pjesë e madhe ishte dhuruar, ishte dhuruar, ka pasur disa borxhe, por më shumë ishte dhuratë, faktikisht”.
Momenti ishte pak a shumë i ngjashëm me atë që ndodhi më herët gjatë javës gjatë takimit me presidentin e Francës, Emmanuel Macron, i cili ka përmirësuar deklarimet e Trumpit rreth natyrës së ndihmës së Evropës për Ukrainën.
Trump: Ukraina s’do të anëtarësohet në NATO
Presidenti amerikan, Donald Trump, ka deklaruar se Ukraina nuk do të anëtarësohet në NATO.
Këto deklarime ai i bëri të enjten në takim me kryeministrin britanik Keir Starmer. Përkundër deklarimeve të Trumpit, Starmer është shprehur se anëtarësimi i Ukrainës në NATO është rrugë e pakthyeshme.
Trump po ashtu ka thënë se marrëveshja për mineralet, që pritet të arrihet të premten (28 shkurt) kur presidenti ukrainas, Volodymyr Zelensky, të mbërrijë në SHBA, është hap garancie për arritjen e paqes me Rusinë.
I pyetur nëse beson se Zelensky është diktator, Trumpi është përgjigjur me: “A e kam thënë këtë?”.
I pyetur nëse një marrëveshje e arritur me Rusinë për të përfunduar luftën në Ukrainë do të zgjaste.
“Kam vetëbesim nëse bëjmë një marrëveshje, do të qëndroj”, ka deklaruar Trumpi.
Zëvendëspresidenti i Shteteve të Bashkuara të Amerikës, JD Vance, ka deklaruar se ka pasur “shkelje të ligjit” ndaj lirisë së shprehjes në Britani, pa prova për të mbështetur këtë.
Starmeri është mbrojtur duke deklaruar se “kemi pasur liri të shprehjes për një kohë të gjatë në Britani”, dhe se vendi do të “vazhdojë” ta ketë.
