-
Përktheu:
Flutura Gashi-Mehmeti
- 27 shkurt 2025 08:57
- Shpërndaje në:
Shtëpia e Bardhë të mërkurën u ka mohuar gazetarëve nga Reuters dhe organizatave të tjera të lajmeve qasjen në takimin e parë të kabinetit të presidentit Donald Trump, në përputhje me politikën e re të administratës në lidhje me mbulimin mediatik.
Shtëpia e Bardhë i mohoi qasjen një fotografi të Associated Press dhe tre reporterëve nga Reuters, HuffPost dhe Der Tagesspiegel, një gazetë gjermane, raporton Reuters.
Ekipet televizive nga ABC dhe Newsmax, së bashku me korrespondentët nga Axios, Blaze, Bloomberg News dhe NPR u lejuan të mbulonin ngjarjen.
Të martën, administrata e Trumpit ka njoftuar se Shtëpia e Bardhë do të përcaktojë se cilat media do të mbulojnë presidentin në hapësira më të vogla si Zyra Ovale.
Shoqata e Korrespondentëve e Shtëpisë së Bardhë (WHCA) ka koordinuar tradicionalisht rotacionin e grupit të shtypit presidencial. Reuters, një shërbim ndërkombëtar kabllor, ka marrë pjesë në grup për dekada të tëra.
Sekretarja e shtypit e Shtëpisë së Bardhë, Karoline Leavitt, ka thënë se ndërsa organizatat tradicionale të medias do të lejohen ende të mbulojnë Trumpin në baza ditore, administrata planifikon të ndryshojë se kush merr pjesë në hapësira më të vogla.
Tri shërbimet kabllore që kanë shërbyer tradicionalisht si anëtarë të përhershëm të grupit të Shtëpisë së Bardhë, AP, Bloomberg dhe Reuters, të mërkurën lëshuan një deklaratë, në përgjigje të politikës së re.
“Shërbimet kanë punuar prej kohësh për të siguruar që informacioni i saktë, i drejtë dhe në kohë në lidhje me presidencën t'i komunikohet një audience të gjerë të të gjitha bindjeve politike, si në Shtetet e Bashkuara dhe globalisht. Pjesa më e madhe e mbulimit të Shtëpisë së Bardhë që njerëzit shohin në mediat e tyre lokale të lajmeve, kudo që janë në botë, vjen nga telat”, thuhet në deklaratën e tri organizatave.
"Është thelbësore në një demokraci që publiku të ketë qasje në lajmet për qeverinë e tyre nga një shtyp i pavarur dhe i lirë”, thuhet më tej në deklaratë.
HuffPost e ka quajtur vendimin e Shtëpisë së Bardhë një shkelje e të drejtës së Amendamentit të Parë për lirinë e shtypit.
Lëvizja vjen pas vendimit të administratës Trump për të ndaluar Associated Press të ketë qasje sepse ajo ka refuzuar t'i referohet Gjirit të Meksikës si Gjiri i Amerikës, emri që Trump i ka caktuar vendit.
