Senati amerikan do ta shqyrtojë mundësinë e bllokimit të shitjes së armëve për Izraelin

Senati i Shteteve të Bashkuara pritet të votojë të mërkurën për ligjin që do ta bllokonte shitjen e armëve për Izraelin.  Projektligji mbështetet nga ligjbërësit që thonë se Izraeli është duke i bllokuar dërgesat e ndihmave që nevojiten dëshpërimisht nga civilët palestinezë në Gazë, raporton Reuters.

“Rezolutat e mosmiratimit” janë dorëzuar nga senatori Bernie Sanders.

Mbështetja e fortë dypartiake për Izraelin do të thotë që rezolutat nuk pritet të kalojnë, por mbështetësit shpresojnë se do ta inkurajojnë qeverinë izraelite dhe administratën e presidentit Joe Biden të bëjnë më shumë për t’i mbrojtur civilët në Gaza.

Shumica e popullsisë 2.3 milionëshe e Gazës është zhvendosur dhe enklava është në rrezik për shkak të urisë akute. Zyrtarët e Ministrisë së Shëndetësisë së Gazës thonë se më shumë se 44 mijë palestinezë janë vrarë në ofensivën 1-vjeçare të Izraelit.

Dy nga rezolutat, të bashkësponsorizuara me senatorët demokratë, Jeff Merkley dhe Peter Welch, synojnë bllokimin e shitjes së predhave dhe municioneve të përbashkëta të sulmit të drejtpërdrejtë (JDAMS). Një e tretë, e sponsorizuar nga senatori demokrat, Brian Schatz, synon ta bllokojë shitjen e raundeve të tankeve.

“Kjo luftë është kryer pothuajse tërësisht me armë amerikane dhe 18 miliardë dollarë amerikanë të taksapaguesve. Izraeli ka hedhur bomba prej 900 kilogramësh të siguruara nga SHBA-ja në lagjet e mbushura me njerëz, ka vrarë qindra civilë për të zhdukur një grusht luftëtarësh të Hamasit dhe ka bërë pak përpjekje për ta bërë dallimin midis civilëve dhe luftëtarëve”, ka thënë Sanders në një deklaratë. “Këto veprime janë të pamoralshme dhe të paligjshme”.

Administrata e Bidenit në tetor i ka thënë Izraelit, se kishte 30 ditë për ta përmirësuar rrjedhën e futjes së ndihmave në Gaza ose do ta rrezikonte ndihmën ushtarake të SHBA-së.

Izraeli thotë se ka punuar për t’i adresuar nevojat humanitare dhe se problemi kryesor me dërgimin e ndihmave ishin sfidat e shpërndarjes nga OKB-ja.

Senatori demokrat, Chris Van Hollen tha të hënën se ai i mbështet rezolutat e përbashkëta, siç bëri edhe senatorja demokrate, Elizabeth Warren javën e kaluar.

Ligji amerikan i jep Kongresit të drejtën t’i ndalojë shitjet e armëve për vendet e huaja, duke miratuar rezoluta mosmiratimi. Edhe pse asnjë rezolutë e tillë nuk ka kaluar në Kongres dhe nuk i ka mbijetuar një vetoje presidenciale, ligji kërkon që Senati të votojë nëse paraqitet një rezolutë. Rezoluta të tilla ndonjëherë kanë çuar në debate të zemëruara e të turpshme për presidentët e kaluar.