Rusia kryen sulme vdekjeprurëse në Ukrainë

(BBC) - Sulmet ruse në rajonet e Kharkivit dhe Dnipros të Ukrainës dhe në qytetin port të Detit të Zi të Odesas të shtunën lanë të vdekur të paktën dy civilë, dogjën një fabrikë ushqimore dhe dëmtuan shtëpi dhe ndërtesa tregtare, thanë zyrtarët rajonalë.

Presidenti Volodymyr Zelensky ka njoftuar se Rusia kishte përdorur tetë raketa të llojeve të ndryshme dhe gati 70 bomba ajrore të drejtuara kundër komuniteteve dhe pozicioneve të vijës së parë të frontit gjatë ditës, pasi forcat ajrore të Ukrainës rrëzuan 13 drone Shahed që synonin rajonet Kharkiv dhe Dnipro gjatë natës.

Zelensky  ka thënë se Moska nuk e dëshiron paqen.

”Rusia duhet të detyrohet ta lë Ukrainën të qetë”, ka theksuar ai. “Një samit botëror i paqes që do të zhvillohet në Zvicër në muajin qershor – pa Rusinë, duhet të ketë sukses” , ka theksuar Zelensky.

Zelensky tha se brigada e 110 e mekanizuar e Ukrainës rrëzoi një avion luftarak rus Su-25 mbi rajonin lindor të Donetskut, një nga katër zonat e Ukrainës që Moska thotë se e ka aneksuar.

Ministri rus i Mbrojtjes Sergei Shoigu tha të premten se Moska kishte marrë nën kontroll 547 km katrorë të territoreve ukrainase këtë vit.

Oleh Syniehubov, guvernator i rajonit të Kharkivit, tha se granatimet ruse vranë një burrë 49-vjeçar në rrugë pranë shtëpisë së tij në fshatin Slobozhanske. Një grua 82-vjeçare u vra dhe dy burra u plagosën në granatimet gjatë natës në qytetin Kharkiv, shkroi ai në aplikacionin Telegram.

Një sulm me raketa ruse i vuri flakën një ambienti biznesi në një lagje industriale të qytetit të Kharkivit, duke plagosur gjashtë punonjës, shtoi ai. Prokurorët vendas e identifikuan atë si një fabrikë ushqimore.

Në jug, guvernatori rajonal i Odesas, Oleh Kiper tha se tre persona ishin plagosur në qytet nga një sulm me raketa.

Reuters nuk mundi të verifikonte menjëherë raportet për viktima dhe dëme.

Një komandant i forcave ajrore tha se mbrojtja ajrore rrëzoi të 13 dronët e sulmit gjatë natës, por Syniehubov tha se rënia e mbetjeve të dronëve plagosi katër persona dhe shkaktoi një zjarr në një ndërtesë zyre.

Në rajonin industrial Dnipropetrovsk, bombardimet plagosën një grua 57-vjeçare dhe dëmtuan infrastrukturën në Nikopol, pranë termocentralit bërthamor të Zaporizhzhias, të kontrolluar nga Rusia, dhe dy u plagosën në një tjetër sulm gjatë natës, tha guvernatori rajonal Serhiy Lysak.