Rreth 60% të Hamasit e kemi eliminuar, thotë ministri izraelit

Ministri i Mbrojtjes i Izraelit, Yoav Gallant, u ka thënë të mërkurën ligjvënësve se 60% e forcave të Hamasit janë vrarë ose plagosur, ndërsa u zotua të kthejë pengjet e mbetura.

"Ne shpërndamë 24 batalionet, ose shumicën dërrmuese të tyre. Kemi kthyer gjysmën e pengjeve dhe jemi të vendosur të kthejmë pjesën tjetër”, ka thënë ai gjatë një fjalimi në parlamentin e Izraelit, i njohur si Knesset, raporton AP.

Në nëntë muaj bombardime dhe ofensiva në Gaza, Izraeli ka vrarë më shumë se 38,200 njerëz dhe ka plagosur më shumë se 88,000, sipas Ministrisë së Shëndetësisë të Gazës.

Pothuajse e gjithë popullata është dëbuar nga shtëpitë e tyre. Shumë prej tyre janë zhvendosur disa herë. Qindra mijëra njerëz po qëndrojnë në kampe çadrash, në kushte të rënda.

Sulmi i Izraelit u shkaktua nga sulmi ndërkufitar i Hamasit më 7 tetor, gjatë të cilit militantët vranë 1,200 njerëz në Izraelin jugor, shumica prej tyre civilë, sipas autoriteteve izraelite.

Militantët morën peng rreth 250 persona. Rreth 120 janë ende në robëri, me rreth një e treta që thuhet se kanë vdekur.

Këtë javë trupat izraelite kanë zhvilluar gjithashtu një sulm të ri tokësor në qytetin e Gazës – përpjekja e tij e fundit për të luftuar militantët e Hamasit të rigrupuar në zonat që ushtria më parë ka thënë se ishin pastruar kryesisht.