Policia në alarm pas paralajmërimeve për sulme në dy qytete gjermane

Policia gjermane ka bërë të ditur se është në gatishmëri të lartë përpara festimeve tradicionale të karnavaleve të Gjermanisë këtë javë, pasi mediat sociale të lidhura me grupin militant të Shtetit Islamik kërkuan sulme që synonin tubimet në Këln dhe Nuremberg.

Gazeta "Bild" ka raportuar se një faqe propagandistike në gjuhën gjermane e drejtuar nga IS-i kishte publikuar një imazh kolazh të krijuar me kompjuter, duke u bërë thirrje shikuesve të "zgjedhin objektivin e ardhshëm të sulmit" dhe ku kishte renditur datat dhe vendndodhjet e ngjarjeve të ardhshme të karnavaleve, raporton Reuters.

Festivali i Dashurisë i planifikuar në qytetin holandez të Roterdamit në fillim të marsit është renditur gjithashtu si një objektiv në paraqitjen e një kolazhi me një thikë të përgjakur dhe hashtagun #LetsSlaughter.

Gjermania përjetoi një seri sulmesh të profilit të lartë me lidhje islamike, duke përfshirë një përplasje me veturë dhe goditje me thikë, në prag të zgjedhjeve kombëtare të 23 shkurtit.

Festimet njëjavore të karnavaleve, të cilat nisin të enjten, zhvillohen në disa pjesë, kryesisht në ato katolike jugore dhe perëndimore të Gjermanisë, teksa njerëzit mbushin rrugët për të festuar, konsumojnë sasi të mëdha alkooli dhe kërcejnë.

Janë veçanërisht të popullarizuara në qytetet perëndimore si Këln dhe Duseldorf, ku festimet arrijnë kulmin në "Të hënën e trëndafilit" javën e ardhshme, me dhjetëra mijëra të pranishëm në paradat qw zhvillohen në rrugë.

Policia e Këlnit ka thënë se planifikimi operativ për ngjarjet është duke u përshtatur duke marrë parasysh kërcënimin, por ata kanë thënë gjithashtu se kolazhi synon të shqetësojë popullatën.

Më shumë se 1,400 oficerë do të vendosen në pikat e njohura dhe shërbimet e urgjencës do të jenë të plota 

Organizatorët e karnavaleve në qytetin bavarez të Nurembergut, kanë thënë të mërkurën se një ngjarje e shënjestruar në faqen e internetit të lidhur me IS, Parada Ndërkombëtare e Karnavaleve, ishte anuluar për shkak të shqetësimeve të shprehura nga vendi.

Policia e Nurembergut ka thënë se është në dijeni të kërcënimeve të Shtetit Islamik, të cilat po vlerësoheshin nga shërbimet e sigurisë shtetërore.