Ish-kryetarja e Dhomës së Përfaqësuesve të Shteteve të Bashkuara të Amerikës, Nancy Pelosi, ka thënë se demokratët mund të kishin dalë më mirë në zgjedhjet e së martës nëse presidenti Joe Biden do të tërhiqej më shpejt nga gara.
Pelosi - një nga politikanët më të fuqishme në Uashington - i tha New York Times se “po të tërhiqej presidenti më shpejt, mund të kishte pasur kandidatë të tjerë në garë”.
Vërejtjet e saj janë të fundit ndaj demokratëve pasi partia humbi kontrollin e Shtëpisë së Bardhë dhe potencialisht në të dy dhomat e Kongresit në zgjedhjet e së martës.
Pelosi raportohet se ka udhëhequr shtytjen e demokratëve për ta larguar nga gara Bidenin, i cili u tërhoq në fund të korrikut pas javësh presioni pas debatit të dobët kundër republikanit Donald Trump.
Ndërsa Bideni përfundoi fushatën, ai shpejt zgjodhi zëvendëspresidenten Kamala Harris në vend të tij. Por ajo pësoi humbje bindëse ndaj Trumpit.
“Pritja ishte që, nëse presidenti do të tërhiqej, do të kishte zgjedhje primare”, ka thënë Pelosi.
Zgjedhjet primare nënkuptojnë që demokratët do të kishin disa kandidatë që do të konkurronin për t’u zgjedhur nga anëtarët e partisë për ta pasuar Bidenin si kandidat për Shtëpinë e Bardhë.
Pelosi argumentoi se primaret do ta kishin bërë më të fortë Harrisin.
“Por nuk e dimë këtë. Kjo nuk ndodhi. Ne jetojmë me atë që ndodhi”, ka thënë kongresmenja nga Kalifornia, e cila u rizgjodh për mandatin e 20-të në Dhomën e Përfaqësuesve.
“Dhe për shkak se presidenti e zgjodhi Kamala Harrisin menjëherë, kjo e bëri me të vërtetë pothuajse të pamundur që të kishte zgjedhje primare në atë kohë. Nëse do të kishte qenë shumë më herët, do të kishte qenë ndryshe”, ka shtuar ajo.
