Papa Guineja e Re s’pret të gjejë të mbijetuar nga rrëshqitja masive e dheut

Zyrtarët në Papa Guinenë e Re kanë thënë se nuk presin që të gjejnë të mbijetuar nën rrënojat e rrëshqitjes masive të dheut në veriun e largët të vendit, derisa numri i saktë të vdekurve nën pothuajse dy kate mbeturina dhe baltë mbetet ende i panjohur.

Pajisjet e rënda dhe ndihmat mezi kanë mbërritur në vendin e rrëshqitjes, e cila goditi pothuajse një javë më parë, raporton The Guardian.

"Asnjë trup nuk pritet të jetë i gjallë nën rrënojat në këtë pikë, kështu që është një operacion i plotë për të rikuperuar çdo mbetje njerëzore”, ka thënë për Reuters kryetari i komitetit të fatkeqësive në provincën Enga, Sandis Tsaka.

Zyrtarët janë ende duke u përpjekur të përcaktojnë se sa njerëz janë varrosur nën pjesë të malit që u shemb në fshatin Yambali në rajonin Enga të premten e kaluar.

Më shumë se 2,000 njerëz mund të jenë varrosur të gjallë, sipas qeverisë, por një vlerësim i OKB-së e vendos numrin e të vdekurve në rreth 670, ndërsa një biznesmen vendas dhe ish-zyrtar i ka thënë Reuters se ishte afër 160.

Tsaka ka thënë se qeveria ishte ende e pasigurt për numrin e të vdekurve, megjithëse sipas tij mund të jetë një numër i madh.

“Mund të jetë diku nga qindra në 2000. Unë nuk do të përjashtoja plotësisht 2,000 për shkak të pasigurisë se sa njerëz ishin aty në atë kohë, por nuk mund t'ju jap një përgjigje përfundimtare derisa të përfundojmë hartën sociale”, ka thënë ai.