Një i vdekur dhe shtatë të lënduar në Turqi pasi një teleferik përplaset në një shtyllë

Një person ka vdekur dhe shtatë të tjerë janë lënduar të premten, kur një teleferik në Turqinë jugore goditi një shtyllë dhe u hap, duke bërë që pasagjerët të bien në malin poshtë, kanë bërë të ditur zyrtarët dhe mediat lokale.

Dhjetëra njerëz të tjerë mbetën të bllokuar deri në orët e vona të natës pasi i gjithë sistemi i teleferikut u ndal, raporton AP.

Dy fëmijë ishin mes të lënduarve në aksidentin në teleferikun "Tunektepe" pak jashtë qytetit të Antalias rreth orës 18:00, ka bërë të ditur agjencia shtetërore Anadolu.

Agjencia e ka identifikuar të vdekurin si një burrë turk 54-vjeçar, derisa të lënduarit ishin edhe gjashtë qytetarë të tjerë turq.

Pesë nga të plagosurit u larguan nga mali me helikopter dhe përpjekjet vazhduan për të larguar dy personat e tjerë të lënduar, ka bërë të ditur ministri i Brendshëm Ali Yerlikaya, tre orë pas aksidentit.

Operacioni i shpëtimit përfshiu më shumë se 160 reagues të parë, duke përfshirë ekuipazhet ajrore nga Rojet Bregdetare dhe ekipet e alpinizmit nga pjesë të ndryshme të Turqisë.

Rreth 184 pasagjerë të tjerë u bllokuan në 25 teleferikë të tjerë dhjetëra metra mbi tokë, ndërsa inxhinierët po përpiqeshin të rinisnin sistemin, ka thënë në një deklaratë kryetari i bashkisë së Antalias Muhittin Bocek.