Netanyahu e mohon se ka presion brenda kabinetit për të mos e pranuar armëpushimin

Kryeministri izraelit, Benjamin Netanyahu mohoi të hënën se kishte "presion" nga qeveria e tij e koalicionit për të hedhur poshtë një propozim armëpushimi të prezantuar nga presidenti i SHBA-së, Joe Biden, për t'i dhënë fund luftimeve në Gaza.

Netanyahu ka thënë se "eliminimi i Hamasit" ishte ndër qëllimet kryesore të luftës dhe jo "diçka që po shtoj sepse isha nën presion në koalicion", raporton AP.

Shumë izraelitë po i kërkojnë Netanyahut të përqafojë propozimin e Bidenit, por aleatët e ekstremit të djathtë kërcënojnë se do ta rrëzojnë qeverinë e tij nëse ai e bën këtë.

Netanyahu ka thënë se një armëpushim i përhershëm në Gaza do të ishte “i pasuksesshëm” derisa të plotësohen kushtet e kahershme për përfundimin e luftës.

Ndërmjetësuesit e SHBA-së, Egjiptit dhe Katarit bënë presion ndaj Izraelit dhe Hamasit, duke thënë se marrëveshja e propozuar “ofron një udhërrëfyes për një armëpushim të përhershëm dhe përfundimin e krizës” dhe u jep lehtësim të menjëhershëm pengjeve dhe banorëve të Gazës.

Por ministri i Financave i ekstremit të djathtë, Bezalel Smotrich dhe ministri i Sigurisë Kombëtare, Itamar Ben Gvir, kanë thënë se do të largohen nga qeveria nëse ajo e pranon marrëveshjen.

Kjo mund ta ekspozojë Netanyahun ndaj zgjedhjeve të reja, shqyrtimit të dështimeve të sigurisë që çuan në luftë dhe, nëse ai humbet postin e kryeministrit, në ndjekje penale për akuza të gjata për korrupsion.

Biden ka deklaruar të premten se militantët e Hamasit "nuk janë më në gjendje" të kryejnë një sulm në shkallë të gjerë ndaj Izraelit si ai i 7 tetorit.

Ai i kërkoi Izraelit dhe Hamasit të arrijnë një marrëveshje për lirimin e rreth 100 pengjeve të mbetura, së bashku me trupat e rreth 30 të tjerëve, për një armëpushim të zgjatur.