Narendra Modi nis një vizitë në Rusi, takohet me Putinin

Kryeministri i Indisë, Narendra Modi fillon të hënën një vizitë dy-ditore në Rusi, e para e tij që kur Moska dërgoi trupat e saj në Ukrainë. 

Konflikti i vazhdueshëm ka komplikuar marrëdhëniet midis aleatëve të vjetër dhe e ka shtyrë Rusinë më afër rivalit të Indisë, Kinës, raporton AP.

Udhëtimi dyditor i kryeministrit Modi përfshin një takim me presidentin, Vladimir Putin, të cilin e pa për herë të fundit në Rusi në vitin 2019, në portin lindor të Vladivostok. Të dy liderët u takuan gjithashtu personalisht në shtator të vitit 2022 në Uzbekistan, në një samit të bllokut të Organizatës së Bashkëpunimit të Shangait.

Rusia ka pasur lidhje të forta me Indinë që nga Lufta e Ftohtë dhe rëndësia e Nju Delhit si një partner kryesor tregtar për Moskën është rritur që kur Kremlini dërgoi trupa në Ukrainë në shkurt 2022. Kina dhe India janë bërë blerës kryesorë të naftës ruse pas sanksioneve të vendosura nga Shtetet e Bashkuara dhe aleatët e tyre që mbyllën shumicën e tregjeve perëndimore ndaj eksporteve ruse.

Nën udhëheqjen e Modit, India ka shmangur dënimin e operacionit të Rusisë në Ukrainë, duke theksuar nevojën për një zgjidhje paqësore.

Megjithatë, partneriteti midis Moskës dhe Nju Delhit është bërë i tensionuar, që kur Rusia filloi të zhvillonte lidhje më të ngushta me rivalin kryesor të Indisë, Kinën, për shkak të armiqësive në Ukrainë.

Një konfrontim në qershor të vitit 2020 përgjatë kufirit të diskutueshëm Kinë-Indi ndryshoi në mënyrë dramatike marrëdhëniet e tyre, ndërsa trupat rivale luftuan me gurë, shkopinj dhe grushta. Të paktën 20 trupa indiane dhe katër ushtarë kinezë u vranë atëherë. Tensionet kanë vazhduar që atëherë, pavarësisht bisedimeve.