Policia islamike në veri të Nigerisë, në shtetin Kano, ka arrestuar myslimanët që janë parë duke ngrënë e pirë publikisht, si dhe ata që shesin ushqim në fillim të Ramazanit, në muajin kur myslimanët supozohet të agjërojnë deri në mbrëmje.
Zëvendëskomandanti i Hisbahit, Mujahid Aminudeen, ka thënë për BBC-në se 20 persona janë arrestuar për mosagjërim dhe pesë për shitje të ushqimit. Policia ka bërë të ditur se operacionet do të vazhdojnë përgjatë gjithë muajit, që nga e shtuna.
“Është e rëndësishme të theksohet se ne nuk shqetësohemi për jomyslimanët”, ka thënë ai. Aminudeen ka thënë se asnjë “mosrespekt” për Ramazanin nuk do të falet.
“Është zemërthyese që në një muaj të tillë të shenjtë të agjërimit, të rriturit myslimanë shihen duke ngrënë e pirë në publik. Ne nuk do ta falim këtë dhe kjo është pse ne kemi bërë arrestime”, ka thënë ai.
Ai ka thënë se të 25 personat do të dënohen sipas gjykatës së Sheriatit.
Dy dekada më parë, Sheriati u prezantua në 12 shtetet veriore të Nigerisë, me shumicë myslimane. Këto ligje nuk vlejnë për zonat e banuara me krishterë.
