Musk zotohet të japë 1 milion dollarë në ditë për votuesit e Pensilvanisë

Miliarderi i teknologjisë, Elon Musk, ka thënë se do t'ia japë 1 milion dollarë në ditë një votuesi të regjistruar në shtetin kyç të Pensilvanisë, deri në zgjedhjet presidenciale në SHBA në nëntor.

Fituesi do të zgjidhet rastësisht nga ata që nënshkruajnë një peticion pro Kushtetutës nga grupi i fushatës së Musk "AmericaPAC", të cilin ai e ngriti për të mbështetur ofertën e kandidatit republikan, Donald Trump për t'u rikthyer në Shtëpinë e Bardhë, raporton BBC.

Çeku i parë në stilin e lotarisë iu dha një pjesëmarrësi në një ngjarje, të shtunën mbrëma.

Dhurata do të ndihmojë në mënyrë efektive për të inkurajuar votuesit e mundshëm të Trumpit që të përfshihen në fushatë gjatë javëve të fundit të garës presidenciale, përpara votimit më 5 nëntor.

Ata që nënshkruajnë peticionin, i cili zotohet të mbështesë fjalën e lirë dhe të drejtat e armëve, do të duhet të japin detajet e tyre të kontaktit, duke lejuar potencialisht "AmericaPAC" të kontaktojë me ta për votën e tyre.

Musk, i cili është shfaqur si një mbështetës kryesor i Trumpit në vitet e fundit, nisi "AmericaPAC" në korrik me synimin për të mbështetur fushatën e ish-presidentit.

Ai deri më tani ka dhuruar 75 milionë dollarë për grupin, i cili është bërë shpejt një lojtar qendror në fushatën zgjedhore të Trumpit.

Musk është aktualisht njeriu më i pasur në botë, me një pasuri në vlerë neto prej 248 miliardë dollarësh, sipas revistës amerikane të biznesit Forbes.

Gara presidenciale e vitit 2024 ka të ngjarë të zbresë në shtatë shtete kyçe të fushëbetejës, duke përfshirë Pensilvaninë, si dhe Wisconsin, Karolinën e Veriut, Xhorxhia, Michigan, Arizona dhe Nevada.