Ministri japonez viziton Ukrainën

Ministri i Jashtëm i Japonisë mbërriti në Kiev të shtunën për të diskutuar thellimin e aleancës ushtarake të Koresë së Veriut me Rusinë, duke përfshirë vendosjen e mijëra trupave për ta mbështetur luftën e Moskës në Ukrainë.

Ministri i Jashtëm, Takeshi Iwaya, do të takohet me homologun e tij ukrainas, Andrii Sybiha, për të riafirmuar mbështetjen e fortë të Japonisë për Ukrainën kundër pushtimit të Rusisë dhe për të diskutuar sanksione të mëtejshme kundër Moskës, ka njoftuar  Ministria e Jashtme e Japonisë, raporton AP.

Në krye të agjendës është shqetësimi i madh i Tokios për bashkëpunimin ushtarak në rritje midis Koresë së Veriut dhe Rusisë,  ka deklaruar  ministria.

Sipas vlerësimeve të inteligjencës së SHBA-së, Koresë së Jugut dhe Ukrainës, deri në 12 mijë  trupa të Koresë së Veriut janë dërguar në Rusi si pjesë e një traktati të madh të mbrojtjes midis vendeve. Javën e kaluar, zyrtarët ukrainas thanë se Ukraina dhe trupat e Koresë së Veriut u angazhuan në luftime në shkallë të vogël, ndërsa ushtria e Ukrainës gjuajti me artileri ushtarët koreano-veriorë në rajonin kufitar të Kurskut të Rusisë, ku Ukraina nisi një inkursion të befasishëm më 6 gusht.