-
Përktheu:
Flutura Gashi-Mehmeti
- 23 qershor 2024 10:40
- Shpërndaje në:
Mijëra luftëtarë nga grupet e mbështetura nga Irani në Lindjen e Mesme kanë shprehur gatishmërinë të shkojnë në Liban për t'u bashkuar me grupin militant Hezbollah në betejën e tij me Izraelin, nëse konflikti përshkallëzohet në një luftë të plotë.
Shkëmbime zjarri kanë ndodhur pothuajse çdo ditë përgjatë kufirit të Libanit me Izraelin verior, që kur luftëtarët nga Rripi i Gazës i kontrolluar nga Hamasi organizuan një sulm të përgjakshëm në Izraelin jugor, në fillim të tetorit që shkaktoi luftën në Gaza, raporton AP.
Situata në veri u përkeqësua këtë muaj pasi një sulm ajror izraelit vrau një komandant të lartë ushtarak të Hezbollahut në Libanin jugor. Hezbollahu u kundërpërgjigj duke gjuajtur qindra raketa dhe dronë shpërthyes në veri të Izraelit.
Zyrtarët izraelitë kanë kërcënuar me një ofensivë ushtarake në Liban nëse nuk ka një fund të negociuar për ta larguar Hezbollahun nga kufiri.
Gjatë dekadës së kaluar, luftëtarët e mbështetur nga Irani, Libani, Iraku, Afganistani dhe Pakistani luftuan së bashku në konfliktin 13-vjeçar të Sirisë, duke ndihmuar në ndryshimin e ekuilibrit në favor të presidentit sirian, Bashar Assad. Zyrtarët nga grupet e mbështetura nga Irani thonë se ata gjithashtu mund të bashkohen përsëri kundër Izraelit.
Udhëheqësi i Hezbollahut, Hassan Nasrallah ka thënë në një fjalim të mërkurën se udhëheqësit militantë nga Irani, Iraku, Siria, Jemeni dhe vende të tjera janë shprehur të gatshëm të dërgojnë dhjetëra mijëra luftëtarë për të ndihmuar Hezbollahun, por ai tha se grupi tashmë ka më shumë se 100,000 luftëtarë.
“Ne u thamë atyre, faleminderit, por jemi të mbingarkuar nga shifrat që kemi”, ka thënë Nasrallah.
Ai ka shtuar se beteja në formën e saj aktuale po përdor vetëm një pjesë të fuqisë punëtore të Hezbollahut. Por kjo mund të ndryshojë në rast të një lufte gjithëpërfshirëse.
Nasrallah la të kuptohet për këtë mundësi në një fjalim në vitin 2017, në të cilin ai tha se luftëtarët nga Irani, Iraku, Jemeni, Afganistani dhe Pakistani "do të jenë partnerë" të një lufte të tillë.
Zyrtarët nga grupet libaneze dhe irakiane të mbështetur nga Irani thonë se luftëtarët e mbështetur nga Irani nga i gjithë rajoni do të bashkohen nëse lufta shpërthen në kufirin Liban-Izrael. Mijëra luftëtarë të tillë janë vendosur tashmë në Siri dhe mund të kalojnë lehtësisht përmes kufirit të pashënuar.
Disa nga grupet tashmë kanë organizuar sulme ndaj Izraelit dhe aleatëve të tij që nga fillimi i luftës Izrael-Hamas më 7 tetor. Grupet nga i ashtuquajturi "boshti i rezistencës" thonë se po përdorin një "strategji të unitetit të arenës" dhe ata do ndalonin së luftuari vetëm kur Izraeli të përfundojë ofensivën e tij në Gaza kundër aleatit të tyre, Hamasit.
"Ne do të luftojmë krah për krah me Hezbollahun nëse shpërthen një luftë gjithëpërfshirëse”, ka thënë një zyrtar i një grupi të mbështetur nga Irani në Irak për Associated Press në Bagdad.
Zyrtari, së bashku me një tjetër nga Iraku, ka thënë se disa këshilltarë nga Iraku janë tashmë në Liban.
Një zyrtar i një grupi libanez të mbështetur nga Irani, duke këmbëngulur gjithashtu për anonimitet, ka thënë se luftëtarët nga Forcat e Mobilizimit Popullor të Irakut, Fatimiyoun i Afganistanit, Zeinabiyoun i Pakistani, dhe grupi rebel i mbështetur nga Irani në Jemen, i njohur si Houthis, mund të vijnë në Liban për të marrë pjesë në një luftë.
