Të paktën 14 persona janë vrarë në sulmet ajrore izraelite brenda disa objekteve ushtarake në Sirinë qendrore, ka raportuar të hënën agjencia shtetërore siriane e lajmeve, transmetoi BBC-ja.
Një drejtor spitali ka deklaruar se edhe 43 persona të tjerë janë plagosur në sulmet e ndodhura në afërsi të Masyaf, në provincën Hama, të dielën mbrëma.
Një grup monitorues me bazë në Mbretërinë e Bashkuar ka raportuar se të paktën katër ushtarë dhe tre civilë janë vrarë në sulmet që shkatërruan objektet ushtarake ku ishin të pranishme grupet e armatosura të mbështetura nga Irani.
Sulmet izraelite thuhet se janë shtuar që nga fillimi i luftës në Gazë në tetor të vitit të kaluar, në përgjigje të sulmeve ndërkufitare në veri të Izraelit nga Hezbollahu dhe grupe të tjera në Liban dhe Siri.
