Macron: Rusia s’mund të vendosë lidhur me vendosjen e paqeruajtësve në Ukrainë

Vendosja e trupave paqeruajtëse në Ukrainë, siç propozohet nga Britania dhe Franca si pjesë e një marrëveshjeje armëpushimi me Rusinë, është një çështje që duhet ta vendosë Kievi dhe jo Moska, ka deklaruar në një intervistë presidenti francez, Emmanuel Macron.

Macron dhe kryeministri britanik Keir Starmer kanë nxituar për të konsoliduar mbështetjen ushtarake për Ukrainën teksa presidenti i SHBA-së Donald Trump kërkon një marrëveshje paqeje me Rusinë.

Starmer ka organizuar një takim virtual të shtunën me Macronin dhe aleatë të tjerë jo-amerikanë të Ukrainës.

"Ukraina është sovrane. Nëse kërkon që forcat aleate të jenë në territorin e saj, nuk është diçka që Rusia ta pranojë apo jo”, ka thënë Macron në një intervistë të përbashkët me disa gazeta rajonale franceze të botuar vonë të shtunën.

Rusia e ka hedhur poshtë vazhdimisht idenë që ushtarët nga vendet që i përkasin aleancës së NATO-s të vendosen në Ukrainë.

Macroni ka thënë se çdo forcë paqeruajtëse do të përbëhet nga "disa mijëra trupa për vend" që do të vendoseshin në vende të rëndësishme, duke shtuar se një numër vendesh evropiane dhe jo-evropiane janë të interesuara për të marrë pjesë....

Por si aspektet e tjera të një armëpushimi të mundshëm, forma e çdo force paqeruajtëse mbetet e pasigurt.

Britania dhe Franca të dyja thonë se mund të dërgojnë paqeruajtës në Ukrainë, ndërsa kryeministri australian, Anthony Albanese, ka thënë se vendi i tij ishte gjithashtu i hapur ndaj kërkesave.

Presidenti rus, Vladimir Putin, ka thënë të enjten se ai mbështet në parim propozimin e Uashingtonit për një armëpushim 30-ditor me Ukrainën, por se forcat e tij do të luftojnë derisa të përpunohen disa kushte vendimtare.

Rusia dhe Ukraina vazhduan sulmet ajrore ndaj njëra-tjetrës, duke shkaktuar lëndime dhe dëme, kanë thënë zyrtarët herët të dielën.