-
Përktheu:
Flutura Gashi-Mehmeti
- 30 prill 2025 11:40
- Shpërndaje në:
Zëdhënësi i Kremlinit, Dmitry Peskov, ka deklaruar të mërkurën se presidenti rus, Vladimir Putin është i hapur për paqen në Ukrainë dhe po punohet intensivisht me Shtetet e Bashkuara, por konflikti është aq i ndërlikuar sa përparimi i shpejtë që dëshiron Uashingtoni është i vështirë për t'u arritur.
"Presidenti mbetet i hapur ndaj metodave politike dhe diplomatike të zgjidhjes së këtij konflikti”, u ka thënë Peskov gazetarëve, raporton Reuters.
Peskov ka shtuar se synimet e Rusisë duhet të arrihen dhe se preferenca e Moskës ishte t'i arrinte ato në mënyrë paqësore.
Ai ka theksuar se Putini kishte shprehur gatishmërinë për bisedime të drejtpërdrejta me Ukrainën, por se ende nuk kishte asnjë përgjigje nga Kievi.
"Fatkeqësisht, ne nuk kemi dëgjuar ndonjë deklaratë në këtë kontekst nga Kievi. Kështu që ne nuk e dimë nëse Kievi është gati apo jo”, u ka thënë Peskov gazetarëve në anglisht.
Presidenti i SHBA-së, Donald Trump, i cili thotë se dëshiron të mbahet mend si një paqebërës, ka thënë vazhdimisht se dëshiron t'i japë fund luftës më shumë se tre-vjeçare në Ukrainë.
"Ne e kuptojmë se Uashingtoni është i gatshëm të arrijë një sukses të shpejtë në këtë proces”, ka thënë Peskov në anglisht.
Por TASS ka cituar Peskovin të thoshte se shkaqet rrënjësore të Ukrainës ishin shumë komplekse për t'u zgjidhur brenda një dite.
Trumpi ka deklaruar të martën se mendonte se Putini dëshiron të ndalojë luftën në Ukrainë, duke shtuar se nëse nuk do të ishte për të, atëherë Rusia do të përpiqej të merrte të gjithë Ukrainën.
“Nëse nuk do të isha unë, mendoj se ai do të dëshironte të merrte të gjithë vendin”, është shprehur Trump.
Ai ka refuzuar t'i përgjigjej pyetjes nëse Shtetet e Bashkuara do të ndalonin ndihmën ushtarake për Ukrainën nëse Uashingtoni largohej nga bisedimet.
Vendimi i Putinit për të dërguar dhjetëra mijëra trupa në Ukrainë në vitin 2022 shkaktoi konfrontimin më të keq midis Moskës dhe Perëndimit që nga kriza e raketave Kubane e vitit 1962, e cila konsiderohet të jetë koha kur dy superfuqitë e Luftës së Ftohtë iu afruan më shumë luftës bërthamore.
