Kremlini ndryshon doktrinën bërthamore pas vendimit të Bidenit për Ukrainën

Janë hartuar ndryshime në doktrinën bërthamore të Rusisë dhe do të zyrtarizohen sipas nevojës, kanë njoftuar zyrtarë Kremlinit të martën, duke e theksuar sërish shqetësimin e Moskës për vendimin e fundit të SHBA-së për përdorimin e armëve amerikane thellë territorit rus nga Ukraina, raporton Reuters.

“Ndryshimet tashmë janë formuluar praktikisht. Ato do të zyrtarizohen sipas nevojës”, ka thënë Dmitry Peskov, zëdhënësi i Kremlinit, për agjencinë shtetërore të lajmeve TASS.

Kremilini e ka quajtur të hënën vendimin e administratës së presidentit, Joe Biden si të pamatur dhe ka paralajmëruar se Moska do të përgjigjet.

Rusia, e cila ka nisur pushtimin në shkallë të plotë të Ukrainës, në mënyrë të përsëritur ka paralajmëruar se Perëndimi po luan me zjarr, duke i kaluar kufijtë që fuqia bërthamore (Rusia) mund ose nuk mund t’i tolerojë.

Në shtator, presidenti rus, Vladimir Putin ka thënë se aprovimi perëndimor i përdorimit të raketave me rreze të gjatë nga Kievi, mund të nënkuptojë “përfshirjen e drejtpërdrejtë të vendeve të NATO-s, Shteteve të Bashkuara dhe vendeve evropiane në luftën në Ukrainë”, sepse infrastruktura ushtarake dhe personeli i NATO-s, do të përfshihej në vendosjen e shënjestrës dhe lëshimin e raketave.

Vendimi i Bideni ka ardhur pas lutjeve të presidentit ukrainas, Volodymyr Zelensky për ta lejuar ushtrinë e Ukrainës t’i përdorë armët amerikane për të goditur objektiva ushtarake ruse larg kufirit ukrainas.

Aprovimi i SHBA-sa erdhi kryesisht si përgjigje ndaj vendosjes së trupave veriokoreane nga Rusia për t’i plotësuar forcat e veta, zhvillim që ka shkaktuar alarm në Washington dhe Kiev.

Vetëm disa javë përpara zgjedhjeve presidenciale të SHBA-së në nëntor, Putini urdhëroi ndryshime në doktrinën bërthamore për të thënë se çdo sulm konvencional ndaj Rusisë, i ndihmuar nga një fuqi bërthamore, mund të konsiderohet si sulm i përbashkët ndaj Rusisë.

Peskov i ka thënë TASS-it të martën se Moska është e gatshme t’i normalizojë lidhjet e saj me Washingtonin.

“Por ne nuk mund të kërcejmë tango të vetëm”, ka thënë Peskovi. “Dhe nuk do ta bëjmë këtë gjë”.