Koreja e Veriut konfirmon dërgimin e trupave të saj në luftën në Ukrainë

Koreja e Veriut ka konfirmuar për herë të parë se ka dërguar trupa për të luftuar për Rusinë kundër Ukrainës.

Në një raport për agjencinë shtetërore të lajmeve KCNA, ushtria e Phenianit pretendon se ushtarët e saj ndihmuan forcat ruse "të çlironin plotësisht" rajonin kufitar Kursk, sipas një urdhri të dhënë nga udhëheqësi Kim Jong Un, raporton BBC.

Njoftimi i Phenianit vjen vetëm disa ditë pasi shefi i Shtabit të Rusisë, Valery Gerasimov, vlerësoi "heroizmin" e trupave të Koresë së Veriut, hera e parë që Moska e ka pranuar publikisht përfshirjen e tyre.

Zyrtarët perëndimorë i kanë thënë më herët BBC-së se besonin se të paktën 1,000 nga 11,000 trupat e dërguar nga Koreja e Veriut janë vrarë gjatë tre muajve.

Gerasimov gjithashtu pretendon se Moska ka rifituar kontrollin e plotë të rajonit perëndimor të Kurskut të vendit, një pretendim i mohuar nga Ukraina.

Duke iu përgjigjur deklaratës, SHBA-ja ka thënë se Koreja e Veriut tani duhet të mbajë përgjegjësinë për vazhdimin e luftës. 

Inteligjenca e Koresë së Jugut dhe ajo perëndimore kanë raportuar prej kohësh se Pheniani ka dërguar mijëra trupa në Kursk vitin e kaluar.

Vendimi për të vendosur trupa ishte në përputhje me një traktat të mbrojtjes reciproke midis Phenianit dhe Moskës, ka thënë KCNA.

“Ata që luftuan për drejtësi janë të gjithë heronj dhe përfaqësues të nderit të atdheut”, ka thënë Kim sipas KCNA.

Koreja e Veriut dhe Rusia demonstruan "aleancën dhe vëllazërinë" e tyre në Kursk, duke shtuar se një "miqësi e provuar me gjak" do të kontribuojë shumë në zgjerimin e marrëdhënieve "në çdo mënyrë".

KCNA-ja nuk ka thënë se çfarë do të ndodhte me trupat e Koresë së Veriut pas përfundimit të misionit të tyre në Kursk dhe nëse ata do të mund të kthehen në shtëpi.

Raportet se ushtarët e Koresë së Veriut ishin vendosur për të luftuar për Rusinë janë bërë fillimisht në tetor, pas thellimit të lidhjeve dypalëshe midis Kimit dhe Putinit.