-
Përktheu:
Flutura Gashi-Mehmeti
- 13 janar 2025 11:59
- Shpërndaje në:
Katari si ndërmjetës i bisedimeve, u ka dorëzuar Izraelit dhe Hamasit një draft "përfundimtar" të një marrëveshjeje armëpushimi dhe lirimin e pengjeve, të krijuar për t'i dhënë fund luftës në Gaza, i ka thënë Reuters të hënën një zyrtar i informuar mbi negociatat.
Një përparim është arritur në Doha të dielën pas mesnate, pas bisedimeve midis shefave të spiunazhit të Izraelit, të dërguarit të presidentit të zgjedhur Trump për Lindjen e Mesme dhe kryeministrit të Katarit, ka thënë zyrtari.
Presidenti i SHBA-së, Joe Biden ka folur të dielën me kryeministrin izraelit, Benjamin Netanyahu, ka bërë të ditur Shtëpia e Bardhë.
Zyrtarët amerikanë po nguten për të arritur një marrëveshje pengjesh dhe armëpushimi në Gaza përpara se Bideni të largohet nga detyra, më 20 janar.
Bideni dhe Netanyahu diskutuan përpjekjet në vazhdim për të arritur një marrëveshje për të ndalur luftimet në enklavën palestineze dhe për të liruar pengjet e mbetura atje, ka thënë Shtëpia e Bardhë në një deklaratë lidhur me bisedën telefonike të të dy udhëheqësve.
“Bideni ka theksuar nevojën e menjëhershme për një armëpushim në Gaza dhe kthimin e pengjeve, së bashku me një rritje të ndihmave humanitare të mundësuar nga ndalimi i luftimeve sipas marrëveshjes", thuhet në deklaratë.
Izraeli filloi sulmin e tij në Gaza pasi luftëtarët e Hamasit sulmuan përtej kufijve të saj në tetor 2023, duke vrarë 1,200 njerëz dhe duke marrë më shumë se 250 pengje, sipas raporteve izraelite.
Që atëherë, më shumë se 46,000 njerëz janë vrarë në Gaza, sipas zyrtarëve palestinezë shëndetësorë, me një pjesë të madhe të enklavës së shkatërruar dhe të kapluar nga një krizë humanitare, dhe shumicës së popullsisë së saj të zhvendosur.
