Një sulm ajror izraelit mbi një kompleks ku strehohen gazetarë në Libanin juglindor ka vrarë tre punonjës të mediave, ka raportuar të premten Agjencia Kombëtare e Lajmeve e Libanit.
Stacioni lokal i lajmeve “Al Jadeed” transmetoi pamje nga vendi i ngjarjes ku shihej një ndërtesë që ishte marrë me qira nga media të ndryshme - duke treguar objekte të shembura dhe vetura të shënuara “PRESS” nën rrënoja. Ushtria izraelite nuk lëshoi paralajmërim para sulmit.
Televizioni “Al-Mayadeen” me bazë në Bejrut ka raportuar se dy nga punonjësit e tij - kameramani Ghassan Najar dhe tekniku i transmetimit Mohammed Rida - ishin në mesin e gazetarëve të vrarë. Televizioni “Al-Manar” i grupit Hezbollah raportoi se kameramani Wissam Qassim u vra gjithashtu në sulmin ajror në rajonin Hasbaya.
Disa gazetarë janë vrarë në luftimet përgjatë kufirit Liban-Izrael që nga tetori i vitit të kaluar.
