-
Përktheu:
Blerta Haxhiu
- 12 maj 2024 13:45
- Shpërndaje në:
Forcat izraelite po vazhdojnë luftimet me militantët palestinezë në të gjithë Rripin e Gazës të dielën, duke përfshirë në pjesë të veriut të shkatërruar që ushtria tha se kishte pastruar muaj më parë, ku Hamasi ka shfrytëzuar një vakum sigurie për t’u rigrupuar.
Izraeli e ka portretizuar qytetin jugor të Gazës, Rafah, si bastionin e fundit të Hamasit, duke thënë se duhet ta pushtojë në mënyrë që të ketë sukses në qëllimet e tij për të çmontuar grupin dhe për të kthyer shumë pengje.
Një operacion i kufizuar atje është zgjeruar ditët e fundit, duke detyruar rreth 300 mijë njerëz të largohen dhe duke tërhequr paralajmërime nga Egjipti, ku një zyrtar tha se po e vë në rrezik traktatin e paqes prej dekadash të vendit me Izraelin.
Por pjesa tjetër e territorit të shkatërruar nga lufta duket se ofron mundësi të shumta për Hamasin. Izraeli nuk ka ofruar ende një plan të detajuar për qeverisjen e pasluftës në Gaza, duke thënë vetëm se do të mbajë kontroll të hapur të sigurisë mbi enklavën bregdetare, e cila është shtëpia e rreth 2.3 milionë palestinezëve, raporton Associated Press.
Kryeministri Benjamin Netanyahu, ka hedhur poshtë planet e pasluftës të propozuara nga Shtetet e Bashkuara për Autoritetin Palestinez, i cili administron pjesë të Bregut Perëndimor të pushtuar nga Izraeli, për të qeverisur Gazën me mbështetjen e vendeve arabe dhe myslimane. Këto plane varen nga përparimi drejt krijimit të një shteti palestinez, diçka për të cilën qeveria e Netanyahu është thellësisht kundër.
Me dy aleatët e ngushtë të ndarë, Gaza ka mbetur pa një qeveri funksionale, duke çuar në një prishje të rendit publik dhe duke lejuar Hamasin të rindërtohet edhe në zonat më të goditura.
Palestinezët raportuan bombardime të rënda izraelite gjatë natës në kampin urban të refugjatëve Jabaliya dhe zona të tjera në Rripin verior të Gazës, i cili ka pësuar një shkatërrim të gjerë dhe është izoluar kryesisht nga forcat izraelite për muaj të tërë. Zyrtarët e OKB-së thonë se atje ka krizë urie.
Banorët thanë se avionët luftarakë izraelitë dhe artileria goditën kampin dhe zonën Zeitoun në lindje të qytetit të Gazës, ku trupat janë duke luftuar me militantët palestinezë për më shumë se një javë. Ata u kanë bërë thirrje dhjetëra-mijëra njerëzve që të zhvendosen në zonat e afërta.
“Ishte një natë shumë e vështirë”, ka thënë Abdel-Kareem Radwan, një palestinez 48-vjeçar nga Jabaliya. Ai ka treguar se mund të dëgjonin bombardime intensive dhe të vazhdueshme që nga mesdita e së shtunës. “Kjo është çmenduri”.
Mbrojtja Civile Palestineze tha se nuk ishte në gjendje t’u përgjigjej thirrjeve të shumta për ndihmë nga të dyja zonat, si dhe nga Rafah, në skajin jugor të Gazës. Trupat izraelite janë duke luftuar me militantët atje që kur ushtria pushtoi pikën kufitare aty pranë me Egjiptin javën e kaluar.
Daniel Hagari, zëdhënësi më i lartë i ushtrisë izraelite, bëri të ditur se trupat po luftojnë në të gjitha pjesët e Gazës, “në zonat ku nuk kemi operuar ende dhe në vendet ku kemi vepruar”.
Ai tha se përveç Jabaliyas dhe Zeitoun, forcat po vepronin gjithashtu në Beit Lahiya dhe Beit Hanoun, qytete pranë kufirit verior të Gazës me Izraelin që u bombarduan rëndë në ditët e fillimit të luftës.
