-
Përktheu:
Flutura Gashi-Mehmeti
- 2 qershor 2024 11:59
- Shpërndaje në:
Një këshilltar i kryeministrit të Izraelit, Benjamin Netanyahu, e ka konfirmuar të dielën se Izraeli e ka pranuar një marrëveshje kornizë për përfundimin e luftës në Gaza që është lëshuar nga presidenti amerikan, Joe Biden, megjithatë, ai e ka përshkruar atë si me të meta dhe që kërkon punë.
Në një intervistë për “Sunday Times” të Britanisë, Ophir Falk, këshilltari kryesor i Netanyahut për politikën e jashtme, ka thënë se propozimi i Bidenit ishte "një marrëveshje për të cilën ramë dakord - nuk është një marrëveshje e mirë, por ne duam shumë që pengjet të lirohen”, raporton Reuters.
"Ka shumë detaje për t'u përpunuar, duke përfshirë lirimin e pengjeve dhe shkatërrimin e Hamasit si një organizatë terroriste gjenocidale", ka deklaruar ai.
Bideni të premten paraqiti atë që e përshkroi si një plan trefazor për t'i dhënë fund luftës.
Faza e parë përfshin një armëpushim dhe kthimin e disa pengjeve të mbajtura nga Hamasi, pas së cilës palët do të negociojnë për një ndërprerje të hapur të armiqësive për një fazë të dytë, në të cilën robërit e mbetur të gjallë do të lirohen.
Kjo renditje duket se nënkupton se Hamasi do të vazhdojë të luajë një rol në marrëveshjet shtesë të ndërmjetësuara nga Egjipti dhe Katari - një përplasje e mundshme me vendosmërinë e Izraelit për të rifilluar fushatën për të eliminuar grupin islamik të mbështetur nga Irani.
Bideni ka përshëndetur disa propozime armëpushimi gjatë muajve të fundit, secili me korniza të ngjashme me atë që ai përshkroi të premten, të cilat të gjitha u rrëzuan. Në shkurt ai tha se Izraeli kishte rënë dakord të ndalonte luftimet para Ramazanit, muajit të shenjtë mysliman, që filloi më 10 mars. Asnjë armëpushim i tillë nuk u realizua.
Pika kryesore e pengesës ka qenë këmbëngulja e Izraelit që do të diskutonte vetëm pauza të përkohshme të luftimeve derisa Hamasi të shkatërrohej. Hamasi, i cili nuk tregon asnjë shenjë për t'u larguar, thotë se do të lirojë pengjet vetëm në një rrugë me një fund të përhershëm të luftës.
Falk përsëriti qëndrimin e Netanyahut se "nuk do të ketë një armëpushim të përhershëm derisa të përmbushen të gjitha objektivat tona".
Netanyahu është nën presion për të mbajtur të paprekur qeverinë e tij të koalicionit. Dy partnerë të ekstremit të djathtë kanë kërcënuar se do të protestojnë për çdo marrëveshje që ata mendojnë se e kursen Hamasin. Mirëpo, partneri qendror, ish-gjenerali Benny Gantz, dëshiron që marrëveshja të konsiderohet.
Hamasi ka mirëpritur nismën e Bidenit.
“Fjalimi i Biden përfshinte ide pozitive, por ne duam që kjo të materializohet brenda kornizës së një marrëveshjeje gjithëpërfshirëse që plotëson kërkesat tona”, ka thënë zyrtari i lartë i Hamasit, Osama Hamdan për Al Jazeera të shtunën.
Hamasi kërkon një fund të garantuar të ofensivës në Gaza, tërheqje të të gjitha forcave pushtuese, lëvizje të lirë për palestinezët dhe ndihmë për rindërtim.
Zyrtarët izraelitë e kanë kundërshtuar këtë si një rikthim efektiv në situatën para 7 tetorit, kur Hamasi, i angazhuar për shkatërrimin e Izraelit, sundonte Gazën.
Luftëtarët e saj e përshpejtuan luftën duke sulmuar në jug të Izraelit, ku lanë të vdekur 1200 njerëz dhe morën pengje rreth 250 të tjerë, sipas të dhënave izraelite.
Në sulmin pasues izraelit që ka shkatërruar pjesën më të madhe të enklavës bregdetare të varfër dhe të rrethuar, më shumë se 36,000 palestinezë janë vrarë, thonë zyrtarët mjekësorë të Gazës.
