Forcat Houthi në Jemen kanë njoftuar të dielën se kanë lëshuar raketa dhe dronë drejt anijeve britanike, amerikane dhe izraelite, në kuadër të mbështetjes ndaj palestinezëve në luftën e Gazës.
Grupi i lidhur me Iranin ka thënë se kishte shënjestruar një anije britanike dhe një numër fregatash amerikane në Detin e Kuq, teksa në Detin Arabik dhe Oqeanin Indian kishte sulmuar dy anije izraelite që shkonin në portet izraelite.
Operacionet u zhvilluan gjatë 72 orëve të fundit, bëri të ditur zëdhënësi ushtarak i Houthit, Yahya Saree në një deklaratë televizive, pa dhënë detaje të mëtejshme të sulmeve.
Britania dhe Shtetet e Bashkuara kanë nisur gjithashtu sulme hakmarrëse kundër Houthit, raporton “Reuters”.
Më herët, firma britanike e sigurisë “Ambrey” tha se kishte marrë informacione që tregonin se një anije u sulmua të dielën në Gjirin e Adenit rreth 102 milje detare në jugperëndim të Mukallas në Jemen.
“Anijet në afërsi u këshilluan të bënin kujdes dhe të raportonin çdo aktivitet të dyshimtë”, tha firma. Ajo nuk tha se kush ishte përgjegjës për sulmin dhe nuk dha detaje të mëtejshme.
Sulmet Houthi kanë ndërprerë transportin global përmes Kanalit të Suezit, duke i detyruar kompanitë të rimarrin rrugën drejt udhëtimeve më të gjata dhe më të shtrenjta rreth Afrikës Jugore.
Shtetet e Bashkuara dhe Britania kanë nisur sulme ndaj objektivave Houthi në Jemen.
