Hamasi do të dorëzojë të enjten katër trupa pengjesh, përfshirë dy fëmijë

Hamasi ka bërë të ditur të martën se do të dorëzojë trupat e katër pengjeve të enjten, duke përfshirë dy fëmijë, të mbajtur nga grupi i armatosur palestinez. 

Negociatori i grupit, Khalil al-Hayya ka thënë se trupat që do të lirohen do të përfshijnë ata të familjes Bibas, Shiri dhe fëmijët e saj të vegjël Kfir dhe Ariel, të cilët ishin nëntë muajsh e katër vjeç kur Hamasi i rrëmbeu gjatë sulmit të 7 tetorit 2023, raporton BBC.

Babai i tyre Yarden është liruar nga Hamasi në fillim të këtij muaji.

Al-Hayya ka thënë se Hamasi do të lirojë gjithashtu gjashtë pengje të gjallë të shtunën, dyfishi i numrit të planifikuar fillimisht për t'u liruar.

Në këmbim, Izraeli do të lirojë të gjitha gratë dhe ata nën moshën 19 vjeç të arrestuar që nga tetori i kaluar dhe ka lejuar disa pajisje pastrimi të rrënojave në Gaza përmes kufirit me Egjiptin.

Në një deklaratë, al-Hayya ka thënë se grupi ka rënë dakord "të dorëzojë katër trupa të enjten më 20 shkurt, duke përfshirë trupat e familjes Bibas".

Hamasi pretendonte në nëntor 2023 se ata ishin vrarë në një sulm ajror izraelit, por pa dhënë prova.

Një zyrtar izraelit i ka thënë Reuters se pengjet e vdekur do t'i nënshtrohen identifikimit në Izrael përpara se të emërtohen.

Hamasi ka emëruar gjithashtu dy nga gjashtë izraelitë që do të lirohen të shtunën.

Ata janë Avera Mengistu dhe Hisham al-Sayed, të cilët u kapën përkatësisht në 2014 dhe 2015 pasi kaluan vetë në Gaza. Qeveria izraelite ka thënë se të dy vuanin nga probleme të shëndetit mendor në atë kohë.

Sipas fazës së parë të marrëveshjes së armëpushimit, Hamasi ka rënë dakord të lirojë 33 pengje. Në këmbim, Izraeli ka rënë dakord të lirojë rreth 1900 të burgosur palestinezë.

Bisedimet për përparimin në fazën e dytë të marrëveshjes, sipas së cilës pengjet e mbetura të gjallë do të liroheshin dhe lufta do të përfundonte përgjithmonë - duhej të fillonin në fillim të këtij muaji, por ende nuk kanë filluar.

Ministri i Jashtëm izraelit, Gideon Saar, ka thënë se bisedimet do të fillojnë "këtë javë".

Ai ka deklaruar se Izraeli "nuk do të pranonte praninë e vazhdueshme të Hamasit apo ndonjë organizate tjetër terroriste në Gaza", por ka thënë se Izraeli mund të zgjaste armëpushimin nëse diskutimet do të ishin produktive.

"Nëse shohim se ka një dialog konstruktiv me një horizont të mundshëm për të arritur një marrëveshje atëherë ne do ta bëjmë këtë kornizë kohore të funksionojë më gjatë”, ka thënë Saar.

Një total prej 73 pengjesh mbahen aktualisht në Gaza, një përzierje e ushtarëve dhe civilëve. Kjo përfshin gjithashtu një numër shtetasish tajlandez dhe nepalezë.