Gjykata gjermane dënon politikanin për përdorim të një slogani nazist

Një politikan i profilit të lartë në partinë e ekstremit të djathtë "Alternativa për Gjermaninë" (AfD) u dënua për herë të dytë të hënën për përdorimin e vetëdijshëm të një slogani nazist në një ngjarje politike.

Björn Höcke, i cili planifikon të kandidojë për guvernator në shtetin lindor të Turingisë në shtator, u gjobit për përdorimin e sloganit të ndaluar nazist "Gjithçka për Gjermaninë", raporton AP.

Gjykata Rajonale e Halle e shpalli fajtor 52-vjeçarin për përdorimin e shenjave të organizatave antikushtetuese dhe terroriste dhe e dënoi atë me një gjobë prej 16,900 euro, raportoi agjencia gjermane e lajmeve dpa.

Një ankesë kundër vendimit është e mundur. Dënimi nuk do ta pengojë atë të kandidojë në zgjedhje.

Akuza e përdorimit të simboleve të një organizate antikushtetuese mund të dënohet me gjobë ose deri në tri vjet burgim.

Höcke ishte gjobitur me 13,000 euro në maj, gjithashtu për përdorimin e simboleve të një organizate antikushtetuese, një vendim që avokatët e tij po e apelojnë.

Rasti i mëparshëm u përqëndrua në një fjalim në Merseburg në maj të vitit 2021, në të cilin Höcke përdori frazën "Gjithçka për Gjermaninë!".

Në rastin aktual, prokurorët pretenduan se ai përsëriti veprën në një ngjarje të Alternativës për Gjermaninë, ose AfD, në Gera në dhjetor, "me dijeni të sigurt" se përdorimi i sloganit është një vepër penale.

Ata pretenduan se Höcke tha "Gjithçka për ..." dhe inkurajoi audiencën të thërriste "Gjermaninë!"
Höcke përsëri insistoi se ai nuk bëri asgjë të keqe, raportoi dpa.

Alternativa për Gjermaninë ka ndërtuar një bërthamë të fortë mbështetjeje, veçanërisht në lindjen ish-komuniste – duke përfshirë Turinginë.

Fuqia e partisë në atë rajon e ndihmoi atë të dilte në vendin e dytë në zgjedhjet e Parlamentit Evropian në fillim të muajit qershor, duke marrë 15.9% të votave pavarësisht skandaleve të fundit.