Gjenden pesë trupa me koka të prera në një rrugë në Meksikë

Trupat me kokat e prera të pesë burrave, janë gjetur në një rrugë në Meksikën qendrore, në një zonë të kontrolluar nga karteli i fuqishëm Jalisco New Generation.

Policia është thirrur në një rrugë pranë qytetit Ojuelos, në shtetin Jalisco, të dielën në mëngjes, pasi qeset plastike që përmbanin mbetjet u pikasën nga shoferët, raporton BBC. 

Ekspertët e mjekësisë ligjore janë përpjekur të identifikojnë viktimat, thanë zyrtarët.

Brutaliteti i vrasjeve dhe asgjësimi i trupave në një vend publik janë tregues të qartë të përfshirjes së kartelit të drogës.

Trupat e Gardës Kombëtare arritën  gjithashtu në vendin e ngjarjes dhe gjetën mbetjet e mbështjella me qese të zeza plastike, ka thënë në një deklaratë zyra e prokurorit të shtetit në shtetin Jalisco.

Asnjë nga moshat e viktimave nuk mund të përcaktohet ende dhe një hetim është nisur, sipas zyrës.

Në Jalisco këtë vit, shifrat zyrtare tregojnë se 1,415 njerëz u vranë midis janarit dhe shtatorit.

Më shumë se 30,000 njerëz vriten çdo vit në Meksikë, e cila ka një nga normat më të larta të vrasjeve në botë.

Javën e kaluar, kryetari i një qyteti meksikan të dërmuar nga dhuna për shkak të drogës, u vra më pak se një javë pasi mori detyrën.

Alejandro Arcos u vra në Chilpancingo, një qytet me rreth 280,000 banorë në shtetin jugperëndimor të Guerreros.

Presidentja Claudia Sheinbaum, e cila u betua javën e kaluar, ka përjashtuar një rikthim në luftën kundër drogës të administratave të mëparshme.

Ajo ka thënë se plani i saj i sigurisë do të fokusohej në mbledhjen e inteligjencës mbi kartelet dhe adresimin e shkaqeve sociale të dhunës, një strategji e cilësuar si "përqafime jo plumba" nga paraardhësi i saj në detyrë, Andrés Manuel López Obrador.

Por opozita kërkon masa më të ashpra ndaj bandave.

Që kur qeveria filloi të përdorte ushtrinë meksikane kundër karteleve në vitin 2006, qindra mijëra njerëz janë vrarë dhe dhjetëra mijëra të tjerë janë zhdukur.