Finlanda bën dislokimin e parë për NATO-n gjatë një misioni në Rumani

Finlanda bëri të martën dislokimin e saj të parë për NATO-n që nga anëtarësimi në aleancë në prill të vitit 2023, duke dërguar shtatë avionë luftarakë F-18 në një bazë ushtarake në Rumaninë juglindore, ku do të kryejnë misione mbrojtëse ajrore me avionë rumunë dhe britanikë.

Një komandant i Forcave Ajrore Finlandeze ka thënë se misioni do të ndihmojë në përshpejtimin e integrimit të Finlandës në NATO, raporton Reuters.

"Jam i sigurt se gjatë këtij misioni të mbrojtjes ajrore, integrimi ynë në NATO do të bëjë një hap të madh përpara”, u ka thënë Johan Anttila, komandanti i Krahut Ajror të Finlandës në Karelia, ushtarëve në bazën Mihail Kogalniceanu.

"Ne si ekip do të kemi mësuar shumë dhe e gjithë kjo do të rrisë parandalimin dhe mbrojtjen e NATO-s”, ka shtuar ai.

Aderimi i Finlandës, duke i dhënë fund shtatë dekadave të mos-angazhimit ushtarak, gati dyfishoi gjatësinë e kufirit që ndan Organizata e Traktatit të Atlantikut të Veriut me Rusinë, dhe forcoi krahun e saj lindor në mes të luftës së vazhdueshme të Moskës në Ukrainë.

Rumania, një anëtare e NATO-s që nga viti 2004, ishte ndër shtetet e para të aleancës që miratoi pranimin e Finlandës. Rumania ndan një kufi 650 km me Ukrainën dhe ka pasur fragmente të dronëve rusë të humbur në territorin e saj në mënyrë të përsëritur ndërsa Moska sulmonte portet ukrainase pikërisht përtej lumit Danub që ndan vendet.

Ajo gjithashtu ka një qendër rajonale të trajnimit për avionët F-16 të mbështetur nga NATO-ja, ku pilotët ukrainas së shpejti do të fillojnë të mësojnë se si të fluturojnë avionët F-16 të ofruara nga Holanda.