-
Përktheu:
Flutura Gashi-Mehmeti
- 12 prill 2024 17:53
- Shpërndaje në:
Protestuesit u mblodhën jashtë ambasadës së SHBA-së në Tel Aviv të premten për të kërkuar lirimin e dhjetëra pengjeve të mbajtura nga Hamasi në Gaza.
Demonstruesit mbanin fotografi të mëdha të pengjeve, si dhe tabela me slogane, duke bërë thirrje për ndihmë nga presidenti i SHBA-së, Joe Biden.
“Shpresa jonë e vetme është ndërhyrja ndërkombëtare, kryesisht administrata e SHBA-së”, ka thënë Zahiro Mor, nipi i Avraham Munder, një prej pengjeve.
"Tani për tani, qeveria jonë nuk na jep asgjë dhe po vepron kundër nesh. Ajo nuk po vepron në interesin më të mirë të pengjeve”, ka shtuar Mor.
Më 7 tetor, militantët e Hamasit hynë në jug të Izraelit, duke vrarë mbi 1,200 njerëz dhe duke marrë rreth 250 pengje. Rreth gjysma e pengjeve u liruan në një armëpushim të nëntorit. Hamasi besohet se mban rreth 100 pengje, si dhe eshtrat e rreth 30 personave që u vranë më 7 tetor ose vdiqën në robëri.
"Na ndihmo, Biden”, ka thënë një protestues në megafon, ndërsa një tjetër mbajti një tabelë ku shkruhej "ndalo sakrifikimin e pengjeve".
Bombardimet izraelite dhe ofensivat tokësore kanë vrarë të paktën 33,360 palestinezë në Gaza dhe kanë plagosur 74,993, thotë Ministria e Shëndetësisë.
